AmbonVibes.com – Oras ini, Komisi II DPRD Provinsi Maluku ada biking siap Rancangan Peraturan Daerah (Ranperda) tentang Pangalolaan, Parlindungan, deng Pamanfaatan Pohong. Akang pung target, manjadi regulasi partama di Indonesia, yang ator pangalolaan pohong, iko kebutuhan pembangunan infrastruktur publik.
Komisi II DPRD Provinsi Maluku su molai deng biking studi banding ka Kantor Pusat PT PLN (Persero) di Blok M, Jakarta, Kamis (20/8/2026) lalu, par dapa masukan takait panyusunan Ranperda Hak Inisiatif tentang Pangalolaan, Parlindungan, deng Pamanfaatan Pohong. Ketua Komisi II DPRD Maluku Irawadi pimpin tim yang pi Jakarta. Iko dalang tim Wakil GM PT PLN UIW Maluku dan Maluku Utara, Gamal Kambey dan Ramli Malawat.
Rombongan dapa tarima EVP PLN Pusat Ahmad Muzakir deng Tim Divisi Operasi Distribusi (ODM) Gati Jayeng dan Nur Adi Firawan, juga parwakilan Divisi Regulasi dan Kebijakan (RKJ) Widayaka dan Arsyad Irvana.
Irawadi bilang, PLN jadi salah satu pihak yang parlu tarlibat, tagal pambangunan infrastruktur katanagalistrikan kerap baku tamaso deng kabaradaan pohong mopun lahan masyarakat.
“Perda ini jadi payung hukum, par fasilitasi. Deng bagitu, masyarakat seng dapa kas rugi, deng pambangunan infrastruktur PLN tetap bajalang deng bae. Ini simbiosis mutualisme; program PLN jalang, dan masyarakat tarima hasil,” ujar Irawadi yang dapa kontak dar Ambon, Senen (31/8/2026).
Manurut Irawadi, barbage pambangunan infrastruktur katanagalistrikan, macang jaringan transmisi, gardu induk, Saluran Udara Tegangan Tinggi (SUTT), sampe fasilitas pambangkit, mambutuhkan pangaturan yang jelas, waktu ada di sakitar ruang tumbuh tanaman, ato lahan milik masyarakat.
Tagal itu, dia harap Ranperda Pohong bisa jadi instrumen hukum yang ator kapantingan pambangunan, sakaligus lindung masyarakat deng lingkungan.
Irawadi bilang, inisiatif itu jadi langkah baru di tingkat nasional. Dari 38 provinsi di Indonesia, Maluku jadi provinsi partama yang rancang regulasi khusus soal pangalolaan pohon, sasuai deng tata ruang pambangunan jaringan publik.
“Jadi katong mo ada atorang yang jelas. Pambangunan tetap bajalang, masyarakat seng dapa rugi, dan kabaradaan pohong, deng lingkungan tetap dapa jaga,” kata Irawadi.
Pihak PLN Pusat manyambut positif inisiatif Komisi II DPRD Maluku. PLN dukung panyusunan Ranperda, par bisa lakas kelar jadi regulasi resmi di daerah.
Irawad harap, dukungan PLN bisa kas kuat substansi Ranperda, lebe-lebe par biking kaselarasan antara pambangunan infrastruktur katanagalistrikan, kapantingan masyarakat, deng parlindungan lingkungan di Maluku. (Red/Merindu)
