AmbonVibes.com – Ketua Komisi I DPRD Provinsi Maluku Solichin Buton minta par Pemprov Maluku biking ketat mekanisme verifikasi tarhadap satiap ASN yang mo dudu di jabatan strategis, molai dar kapala dinas sampe pajabat eselon III dan IV.
Solichin bilang akang bagitu tagal balong lama ini, salah satu ASN Pemprov Maluku, Nur Madas, dapa nae status jadi tarsangka dalang parkara tindak pidana korupsi proyek panyadiaan aer barsih di Kecamatan Haruku.
Akang masalah, Nur Madas baru dapa lantik sabage pajabat eselon III di Dinas Pekerjaan Umum dan Perumahan Rakyat (PUPR) Maluku, 17 Juni 2026.
“Verifikasi tarhadap calon pajabat yang mo dapa angka deng pegang jabatan, bae kapala dinas, eselon III mopun eselon IV, musti biking akang deng selektif. Jang sampe ada ASN yang pung rekam jejak tarbae ato ada pung masalah hukum, mar dapa lantik dan dudu di posisi strategis,” ujar Solichin waktu dapa kontak dar Ambon, Jumat (7/8/2026).
Manurut Buton, akang parkara musti jadi bahan evaluasi serius par Pemprov Maluku. Bukang cuma tarhadap proses palantikan yang su jalang, mar juga tarhadap sistem yang dapa pake par seleksi dan promosi ASN ka jabatan tartantu.
Solichin manilai proses pangisian jabatan seng cukup cuma deng lia kalangkapan administrasi mopun parsyaratan formal saorang ASN.
Manurut dia, panalusuran rekam jejak, tarmasuk aspek hukum, parlu jadi bageang panting sabalong saorang ASN layak dudu di posisi strategis.
“Ini jadi pambelajaran barharga. Katong harap eso-eso, Pemprov Maluku batul-batul mo seleksi deng ketat satiap pajabat yang mo dapa lantik. Jang sampe ada yang su tasonto parkara hukum, mar masih dapa kase jabatan,” ucap Solichin.
Dia juga menyoroti peran Badan Pertimbangan Jabatan dan Kepangkatan (Baperjakat) dalang proses tersebut.
Solichin minta Baperjakat bakarja lebe optimal deng pastikan samua tahapan pamariksaan tarhadap calon pajabat, dapa biking sacara manyaluruh sabalong rekomendasi pangangkatan kaluar.
“Baperjakat musti batul-batuk selektif dalang mamariksa barkas deng rekam jejak calon pajabat, par kajadiang sarupa seng taulang kumbali,” tegas Solichin.
Sabage bageang dar fungsi pngawasan DPRD, Komisi I rencana mo pangge Badan Kepegawaian Daerah (BKD) Provinsi Maluku. Pamanggilan par mo minta panjalasan manganae prosedur deng mekanisme verifikasi yang Pemprov Maluku pake par proses promosi deng palantikan pejabat.
Solichin bilang, DPRD parlu tau sajauh mana proses pamariksaan sabalong saorang ASN dapa kas dudu di jabatan struktural, tarmasuk bagemana panalusuran rekam jejak hukum jadi bageang dar partimbangan pangangkatan pajabat.
“Katong mo pangge BKD par minta panjelasan takait prosedur verifikasi dalang proses promosi deng palantikan pajabat,” ujar Solichin.
Dia harap akang evaluasi seng tabrenti di parsoalan satu parkara, mar jadi pintu maso par biking bae sistem pangisian jabatan di lingkungan Pemprov Maluku.
Manurut dia, jabatan pemerentahan musti dapa isi deng ASN yang pung kompetensi, profesionalisme, deng integritas, sakaligus pung rekam jejak yang bisa par tanggong jawab akang.
Deng bagitu, proses promosi deng palantikan pajabat di lingkungan Pemprov Maluku ke depan seng cuma par aspek administratif, mar juga mampu pastikan satiap pajabat yang dapa parcaya di jabatan strategis tabebas dar parsoalan yang bisa ganggu kredibilitas pemerentahan. (Rred/Merindu)
