AmbonVibes.com – Ketua DPRD Provinsi Maluku, Benhur George Watubun mandorong Pemerentah Provinsi (Pemprov) Maluku lakas cari jalang laeng malalui PT Bank Maluku-Maluku Utara (Bank Maluku-Malut) par pembiayaan tagal kepeng yang mo pinjang akang dar pinjaman dar PT Sarana Multi Infrastruktur (SMI) balong fiks.
Manurut Benhur, langkah itu penting par pemerentah bisa pung solusi par baku tongka deng tekanan fiskal yang pung dampak par roda pemerentahan deng pambangunan di Maluku.
“Katong manilai, pemprov sampe oras, balong dapa kapastian takait rencana mo pinjang kepeng dar PT SMI. Tagal itu, pemerentah parlu kajalasan manganai akang proses pinjaman,” ujar Benhur par wartawan di Ambon, Senen (3/8/2026).
Manurut Watubun, sampe oras DPRD balong dapa info manganei hasil ansprak utang di PT SMI, tarmasuk kepeng pung basar barapa banya yang pung potensi par dapa disatujui.
Padahal, akang kapastian paleng parlu, agar pemerintah daerah lakas ambe langkah strategis, par biking bae kondisi kauangan daerah.
Benhur bilang, kalo proses bautang di PT SMI masih balong kepastian, maka Pemprov Maluku parlu lakas cari opsi laeng yang lebe mungkin par fiks.
“Pemerentah musti pikir utang malalui Bank Maluku-Malut. Opsi ini masih layak, tagal bisa capat biking bae kondisi fiskal daerah, sakaligus pastikan barbage program pambangunan yang tatunda bisa kumbali bajalan,” ungkap Benhur.
Tekanan fiskal yang Pemprov Maluku tongka akang, manurut Benhur, marupakan akumulasi dar barbage kawajiban kauangan yang musti kas beres akang.
Kondisi ini seng cuma tagal pandapatan daerah kurang-kurang, mar juga juga beban utang dar periode pemerentahan sabalong ini, deng kawajiban pambayaran par sajumlah pihak ketiga.
Dampak kondisi mulai terasa di palaksanaan program pambangunan sampe deng pamanuhan kawajiban pemerentah par Aparatur Sipil Negara (ASN), tarmasuk pambayaran Tambahan Penghasilan Pegawai (TPP).
Bardasarkan informasi yang DPRD tarima sampe akhir Juli 2026 pambayaran TPP ASN, di lingkungan Pemprov Maluku baru par Januari deng Februari 2026.
Tagal itu, Benhur harap, Pemprov Maluku lakas ambe kaputusan takait skema pambiayaan daerah secara tabuka, agar kondisi fiskal seng lebe biking beban par panyalanggaraan pemerentahan.
“Yang parlu sakarang adalah kapastian. Pemerentah musti lakas ambe kaputusan sahingga palayanan publik tetap bajalang, program pambangunan seng tatunda tarus, deng hak-hak ASN dapa bayar tepat waktu,” tegas Benhur. (Red/Merindu)
