AmbonVibes.com – Anggota DPRD Provinsi Maluku Halimun Saulatu minta pemerentah lakas kas anis masalah baku bantah sipat di kawasan Tanjung Sial, yang su batahang makang taong.
Manurut Halimun, baku batah tarus-tarus lalu usaha par biking abis akang talalu langsam, akang biking warga tatongka masalah hukom deng administrasi, juga hambat akses palayanan publik deng pambangunan.
“Katong seng mo lia baku bantah ini tarus batahang lama-lama, lalu laste-laste masyarakat sandiri yang jadi korban. Dong pung hak-hak dasar musti jadi prioritas, dalang satiap proses panyalesaian,” ujar Halimun, waktu dapa hubung dar Ambon, Jumat (31/7/2026).
Halimun bilang, parsoalan batas wilayah yang balong beres bataong-taong su biking sampe barbagae masalah muncol di tengah masyarakat.
Akang kondisi di Tanjung Sial, bawa dampak administrasi kapandudukan, pelayanan pemerentahan, sampe palaksanaan program pambangunan.
“Parkara yang seng pasti-pasti ini biking masyarakat tinggal dalang posisi dapa rugi tarus. Tagal itu, akang pung panyalasean harus musti taro kapentingan warga di muka, bukang kapantingan laeng,” ucap Halimun.
Dia juga apresiasi Gubernur Maluku Hendrik Lewerissa yang su ambe langkah aktif par biking abis akang baku bantah, tarmasuk koordinasi deng Kamanterian Dalam Negeri (Kemendagri).
“Sabage anggota DPRD, katong apresiasi Gubernur Maluku yang su ambe langkah-langkah. Akang manunjukkan komitmen pemerentah daerah, par cari solusi yang kase kapastian par masyarakat,” kata dia.
Salaeng itu, Halimun buju samua masyarakat, jang gampang tapancing deng barbage isu yang pung potensi biking konflik bale pica.
Manurut dia, situasi kaamanan deng katartiban musti tetap dapa jaga, sambil tunggu kaputusan pemerentah takait panatapan batas wilayah.
“Beta ajak samua pihak, par tarus jaga kaamanan, tahang-tahang diri, deng lebe pilih bicara hati deng hati, par parsoalan ini seng jadi konflik sosial yang bawa rugi par samua pihak,” tegas Halimun.
Dia juga minta Pemerentah Kabupaten Maluku Tengah deng Pemerentah Seram Bagian Barat par tarus jamin palayanan dasar par masyarakat di wilayah yang baku bantah sipat, sondor biking beda status wilayah yang masih dalang proses panyalasean.
“Palayanan masyarakat seng boleh tabrenti. Biar kondisi macang apa lae, kabutuhan dasar musti tarus dong dapa akang deng adil, sondor diskriminasi,” ujar Halimun.
Halimun juga minta samua pihak, taruh hormat keputusan yang Pemerentah Pusat (Pempus) ambe nanti, takait panyalaseian akang sipat.
Dia bilang, kaputusan akhir harus samua tarima, sabage dasar ada kapastian hukom, deng kalancaran panyalanggaraan pemerentahan.
“Laste-laste nanti, katong samua musti hormat par kaputusan Pemerentah Pusat. Yang lebe penting adalah, masyarakat dapa kapastian hukum, palayanan publik bajalang bae, deng pambangunan seng tahambat tagal bau bantah sipat,” tandas Halimun. (Red/Merindu)
