AmbonVibes.com – Komisi III DPRD Maluku minta manajemen PD Panca Karya lakas kase dokumen business plan deng laporan kauangan parusahaan sabage dasar evaluasi tarhadap kinerja akang Badan Usaha Milik Daerah (BUMD) yang masih saki-saki sampe ini oras. Langkah itu par mo tau pasti arah panyehatan parusahaan bajalang pas target deng mampu kas nae kontribusi tarhadap pandapatan daerah.
Katua Komisi III DPRD Maluku Alhidayat Wajo bilang, komisi parlu akang dokumen par dapa gambaran utuh manganai kondisi kauangan, strategi bisnis, deng prospek pangambangan parusahaan, ka muka.
“Katong minta business plan deng laporan kauangan per Mei 2026. Dokumen itu akang jadi dasar par Komisi III mo evaluasi langkah panyehatan PD Panca Karya,” kata Wajo di Ambon, Kamis (23/7/2026).
Manurut dia, kondisi kelauangan PD Panca Karya oras ini masih dalang tahap pamulihan sahingga parusahaan balong bisa par biking kawajiban kas bale kepeng ka pemerentah provinsi Maluku.
“Kalo katong minta pangsmbalian, sakarang, tantu seng mungkin. Oras ini parusahaan masih dalang proses pamulihan sahingga yang paleng panting itu bagemana PD Panca Karya bisa sehat kumbali,” ujar Wajo.
Dia bilang, kepeng yang salama ini PD Panca Karya dapa, itu subsidi Pemerintah Provinsi Maluku yang sacara administratif tetap tacatat sabage kawajiban parusahaan. Mar deng lia kondisi ksuangan oras ini, pangambalian akang kawajiban kira-kira baru dapa kas bale dalang tiga ampa taong mandatang.
Tagal itu, Komisi III manilai evaluasi tarhadap kondisi perusahaan musti biking akang pake data komprehensif, tarmasuk malalui dokumen parancanaan bisnis deng laporan kauangan terbaru.
Salaeng itu, bardasarkan panjelasan direksi dalang rapat, gaji karyawan sampe Mei 2026 su dapa bayar. Samentara parsoalan tunggakan iuran BPJS Kesehatan yang sempat biking karyawan saparu pung seng aktif, akang ada dalang proses.
Komisi III manilai fokus utama oras ini bukang di tuntutan par parusahaan stor dividen ato kas bale kawajiban par pemerintah daerah, malaengkang mo pastikan proses panyehatan parusahaan bajalang sacara taukur.
Malalui business plan deng laporan keuangan yang komisi ada minta akang, DPRD harap bisa ukur efektivitas kabijakan direksi sakaligus susong langkah pangawasan yang tepat par PD Panca Karya mampu tumbuh jadi BUMD yang sehat, profesional, deng kase kontribusi nyata tarhadap pambangunan ekonomi deng paningkatan pandapatan asli daerah di Provinsi Maluku.
(Red/Merindu)
