AmbonVibes – Anggota DPRD Provinsi Maluku Dapil Kota Ambon Ary Sahertian mandukung Pemerentah Kota (Pemkot) Ambon pung kaputusang yang balong kas bajalang sanksi denda par warga yang buang sampah takaruang.
Dia manilai, kasadaran masyarakat par jaga kabarsihan jadi indikator, bahwa pandekatan persuasif yang pemerentah biking su molai bawa akang pung hasil bae.
Ary bilang, parubahan perilaku masyarakat musti dapa apresiasi, tagal akang jadi carmin kabarhasilan barbage upaya edukasi deng sosialisasi, yang salama ini pemerentah biking akang deng barbage elemen masyarakat.
“Kalo katong lia kondisi sakarang, kasadaran masyarakat par jaga kabarsihan su jauh lebe bae. Ini tantu positif, deng musti tarus tahang akang bae-bae,” ujar Ary, waktu dapa kontak dar Ambon, Rabu (22/7/2026).
Dia bilang, panarapan sanksi denda lebe bae jadi langkah paleng laste, kalo pandekatan persuasif deng edukatif su seng efektif lai.
Salama masyarakat masih kas unjuk sikap patuh par buang sampah di akang pung tampa, lebe bae pemerentah tetap kas taru pembinaan di muka.
“Mambangun budaya hidup barsih masih parlu proses barkalanjutan,” ujar Ary.
Tagal itu, pemerentah musti tarus kas kuat edukasi par masyarakat, molai dar lingkungan kaluarga, sakolah, sampe komunitas, par kasadaran manjaga kabarsihan tumbuh dar diri sandiri, bukang tagal takotang dapa sanksi.
Ary tambah lai, kasadaran masyarakat yang su lebe bae ini parlu deng tamba sarana dan prasarana kalola sampah yang mamadai, macang tampa sampah di ruang-ruang publik, armada pangangkut, deng jadwal angka sampayang konsisten.
“Kalo fasilitas tasadia deng bae, masyarakat juga mo lebe gampang iko atorang. Jadi, edukasi deng panyadiaan fasilitas musti bajalang sama-sama,” kata Ary.
Maski bagitu, Ary bilang deng tegas, pemerentah tetap musti tegas tarhadap oknum yang sangaja langar atorang deng biking badaki kota.
Kalo eso-eso dapa palanggaran yang orang biking tarus-tarus, Ary bilang sanksi deng denda, bisa timbang akang par panagakan hukom.
Dia harap, kolaborasi pemerentah, DPRD, deng masyarakat tarus dapa kas kuat par Ambon dapat jadi kota yang barsih, sehat, deng nyaman par saluruh warga.
“Yang paleng panting oras ini, tahang akang tren positif kasadaran masyarakat. Kalo samua pung rasa tanggong jawab tarhadap kabarsihan lingkungan, beta yakin Ambon mo jadi kota yang lebe barsih, sondor pake sanksi,” tutup Ary.
(Red/Merindu)
