AmbonVibes.com – Komisi II DPRD Provinsi Maluku manyoroti efektivitas palaksanaan program Dinas Kelautan dan Perikanan (DKP) Provinsi Maluku pas abis dapa tau sajumlah proyek yang balong kase manfaat optimal par masyarakat maski su biking abis kepeng pemerentah.
Apa yang komisi dapa akang marupakan hasil pangawasan lapangan yang Komisi II biking di sajumlah Unit Pelaksana Teknis (UPT).
Katua Komisi II DPRD Provinsi Maluku Irawadi minta Pemerentah Provinsi Maluku lakas evaluasi manyaluruh tarhadap kinerja DKP pa parsoalan sarupa seng tarus barulang.
“Kondisi ini musti jadi parhatian serius pemerentah daerah. Jang sampe laporan administrasi dapa lia akang bae mar fakta di lapangan justru kas unju hal yang seng sama,” kata Irawadi waktu dapa kontak dar Ambon, Kamis (16/7/2026).
Manurut dia, masih ada sajumlah pakarjaan yang belong kase manfaat par masyarakat, maski su pake kepeng daerah. Tagal itu, diabl minta Gubernur Maluku Hendrik Lewerissa ambe langkah tegas deng evaluasi palaksanaan program di DKP.
Irawadi manilai akang parsoalan bukang tarjadi partama kali. Bardasarkan hasil pangawasan DPRD, barbage catatan sarupa tarus barulang sabang taong maski su ganti pimpinan di akang instansi.
Dalang akang pangawasan, Komisi II dapa sajumlah kagiatang yang dapa biaya dar APBD Taong Anggaran 2024 mopun 2025 belong dapa kas abis. Di sisi laeng, parangkat daerah masih usul program baru maski pakarjaan yang kamuka, akang balong abis.
Salah satu yang komisi dapa akang ada di UPT Kabupaten Kapulauan Aru, yakni pambangunan drainase yang balong barfungsi optimal maski su makang kepeng ratusan juta rupiah.
Salaeng itu, ada gadong pambibitan yang sampe oras balong dapa bake tagal balong ada tanaga operasional. Kondisi akses manuju lokasi balong mamadai sahingga hambat pamanfaatan akang fasilitas.
Komisi II juga dapa fasilitas palabuhan yang balong buka tagal balong tasadia parahu operasional. Manurut Irawadi, akang kondisi pung potensi par aset pemerintah jadi rusak tagal talalu lama seng pake akang.
Salaeng parsoalan pamanfaatan aset, Komisi II juga dapa dokumen parancanaan seng baku cocok deng kondisi di lapangan.
Salah satu itu masin pompa aer masing yang ada dalang dokumen proyek, mar seng ada waktu inspeksi.
Temuan laeng barkaitan deng dugaan spesifikasi pengadaan genset di UPTD Masika Jaya Tahun Anggaran 2024 yang seng pas. Dalang kontrak, masin yang dapa pake, akang pung merek Isuzu, mar hasil pamariksaan manunjukkan genset yang tapasang itu merek Weifang.
“Samua pangadaan musti iko spesifikasi yang su ada dalang kontrak. Itu jadi dasar par jamin kualitas pakelarjaan deng akuntabilitas panggunaan anggaran,” tegas Irawadi.
Takait kamungkinan ada unsur palanggaran hukum, Irawadi bilang DPRD seng mo campor akang proses deng Kase samua par aparat panegak hukum biking pandalaman iko dong pung kawenangan.
Sebagai tindak lanjut, Komisi II DPRD Provinsi Maluku mo pangge Dinas Kelautan dan Perikanan Provinsi Maluku deng panyadia pakarjaan par minta panjelalasan soal samua temuan hasil pangawasan.
“Rapat lanjutan nantu mo katong biking minggu muka par samua pihak bisa kase panjalasan secara tabuka tarhadap barbage temuan yang ada,” tandasnya. (Red/Merindu)
