AmbonVibes.com – Menteri Energi dan Sumber Daya Mineral (ESDM) Bahlil Lahadalia mangaku ada fenomena spekulan atau “cukong” tanah di kawasan Proyek Strategis Nasional (PSN) LNG Abadi Blok Masela, Kabupaten Kapulauan Tanimbar, Maluku. Tagal itu, pemerentah minta proses pambebasan lahan musti selektif deng utamakan hak masyarakat adat sabage pamilik asli.
Bahlil deng cara tegas bilang, pemerentah seng mo biking parlakuan sama tarhadap masyarakat yang pung tanah sacara turung-tamurung deng pihak-pihak yang baru bali lahan waktu proyek mulai bajalang.
“Beta tau di sini ada abuleke. Beta bagi tiga klasifikasi,” kata Bahlil ka wartawan abis hadir di groundbreaking Proyek LNG Abadi Blok Masela di Saumlaki, Kamis (16/7/2026).
Manurut Bahlil, kategori partama adalah masyarakat adat yang turung-tamurung pung hak atas akang tanah. Kategori kedua, warga lokal yang dapa tanah malalui transaksi jual beli antarmasyarakat jauh sabalong proyek mulai, misalnya tagal pamilik sabalong itu parlu biaya par anana pung skolah, ato kaparluan kaluarga yang laeng.
Samantara kategori katiga adalah pihak-pihak yang bali lahan waktu proyek Blok Masela mulai bajalang deng nilai tanah nae tagal ada investasi basar.
“Beta su minta SKK Migas par akang pung parlakuan beda. Seng bisa katong jual hak kasulungan par orang yang bukang pung hak kasulungan. Itu filosofi yang harus dapa jaga,” tegas Bahlil.
Bahlil bilang, pemerentah pung komitmen lindungi hak masyarakat dalang proses pambebasan lahan. Tagal itu, kompensasi par warga seng pake pandekatan ganti rugi, malaengkang ganti untung par masyarakat dapa manfaat yang lebe adil dari pambangunan proyek.
Dia mangaku su lapor langsung akang kabijakan par Presiden Prabowo Subianto sabage bantuk kabarpihakan pemerentah tarhadap masyarakat Maluku.
“Beta inging rakyat katong pung hak-hak seng bole tabiar. Beta su minta tim yang Pak Gubernur deng SKK Migas bantuk par hak-hak rakyat batul-batul jadi prioritas,” ujar Bahlil.
“Itu komitmen beta. Tadi juga beta lapor ka Bapak Presiden. Bukang ganti rugi, mar ganti untung,” kata Bahlil.
Manurut dia, parsoalan kapamilikan tanah di Indonesia timur pung karakteristik laeng kalo banding deng di daerah laeng. Banya tanah adat balong pung sertifikat, mar sacara hukum adat, itu hak ulayat yang dapa waris dari generasi ka generasi sahingga wajib negara hormat akang.
Tagal itu, proses verifikasi kapamilikan lahan akang timbang aspek hukum adat deng kaarifan lokal, maski sabageang kawasan sacara administratif ada di dalang kawasan hutan nagara.
Par cegah masyarakat adat dapa rugi, pemerentah minta samua proses pandataan deng verifikasi bajalang transparan, kas iko pemerentah daerah, SKK Migas, deng instansi takait.
Langkah itu sakaligus par tutu ruang par praktik makelar ato spekulasi tanah yang kerap muncol di muka pambangunan proyek-proyek strategis.
“Makanya Beta minta tolong Pak Menteri Kehutanan, eh Pak Menteri Pertahanan, juga iko par paham kaarifan lokal dalang pangambilan kaputusan yang bijak,” kata Bahlil.
Dia manegaskan, pambangunan PSN LNG Abadi Masela musti kase manfaat sabasar mungkin par masyarakat Maluku, lebe khusus warga Kapulauan Tanimbar, deng sondor kas biar hak-hak masyarakat adat yang su jaga deng tinggal di akang wilayah turung-tamurung. (Tim)
