AmbonVibes.com – Anggota DPRD Provinsi Maluku Anos Yeremias bilang groundbreaking Proyek Strategis Nasional (PSN) Blok Masela sabage momentum sejarah yang su lama masyarakat Maluku tunggu akang, lebe-lebe warga Kapulauan Tanimbar deng Maluku Barat Daya, akang musti bawa kasajahteraan.
Maski sambut positif soal proyek strategis yang su mulai karja lapangan , Anos sorot pimpinan DPRD Provinsi Maluku yang seng iko dalang rangkeang kegiatan groundbreaking. Manurut Anos, akang jadi catatan penting tagal DPRD pung fungsi representasi rakyat, panganggaran, deng pangawasan tarhadap pambangunan daerah.
“Sabage Anggota DPRD Provinsi Maluku, catat bahwa pimpinan DPRD Provinsi Maluku seng dapa kas Iko dalang rangkeang kagiatan groundbreaking Blok Masela. Padahal DPRD marupakan lembaga yang pung fungsi representasi rakyat, panganggaran, deng pangawasan tarhadap pambangunan daerah,” ujar Anos, Kamis (16/7/2026).
Dia harap, eso-eso, koordinasi deng sinergi antara pemerentah pusat, pemerentah daerah, deng lambaga parwakilan rakyat bisa tabangong lebe bae par satiap agenda strategis nasional musti kas iko saluruh pamangku kapantingan daerah.
Maski bagitu, Anos bilang tegas-tegas, parhatian publik seng saharusnya cuma fokus di aspek seremonial ato pihak-pihak yang hadir dalang acara groundbreaking.
Manurut dia, yang jauh lebe panting itu pastikan proyek barnilai strategis banar-banar kase manfaat nyata par masyarakat Maluku.
“Beta seng mau Katong pung perhatian cuma fokus di aspek seremoni ato sapa-sapa datang, sapa seng datang. Yang jauh lebe panting itu pastikan Proyek Strategis Nasional Blok Masela banar-banar kase manfaat nyata par masyarakat,” tegas Anos.
Anos bilang tetap dukung pambangunan Blok Masela deng harapan akang mampu dorong paningkatan kasajahteraan masyarakat, Lebe khusus di Kapulauan Tanimbar deng Maluku Barat Daya sabage wilayah yang paleng deka deng lokasi proyek.
Anos harap lai, masyarakat di kadua daerah dapa kasampatan yang adik par dapa kas taiko di barbage aktivitas ekonomi yang lahir dar akang proyek.
Salaeng manfaat par masyarakat di wilayah sakitar proyek, Anos manilai seluruh rakyat Maluku musti iko rasa dampak positif pambangunan Blok Masela malalui lapangan karja yang tabuka, peningkatan kualitas sumber daya manusia, katarlibatan pangusaha lokal, pambangunan infrastruktur, sampe partumbuhan ekonomi daerah.
Sabage wakil rakyat, dia tegas bilang mo kas jalang fungsi pangawasan par saluruh komitmen pemerentah mopun investor banar-banar dapa realisasi akang.
“Beta mo tarus kas jalang fungsi pengawasan deng berjuang par satiap komitmen pemerentah deng investor seng tabarenti di seremoni groundbreaking, mar musti nyata dalang kabijakan deng program yang barpihak par kapantingan masyarakat Maluku,” kata dia.
Anos harap Blok Masela seng cuma jadi proyek strategis skala nasional, mar juga jadi sumber kasajahteraan yang bisa dapa rasa sacara barkalanjutan oleh masyarakat Kepulauan Tanimbar, Maluku Barat Daya, deng saluruh rakyat Maluku. (Keket)
