AmbonVibes.com – Anggota DPRD Provinsi Maluku Anos Yeremias bilang deng tegas, guru Aparatur Sipil Negara (ASN) yang salama ini mangajar di sakolah yayasan, seng mo dapa tarik secara massal, iko Paraturan Menteri Pendidikan Dasar Menengah (Permendikdasmen).
Panagasan Yeremias, sakaligus pas ambe sikap barbage informasi dalang masyarakat takait Permendikdasmen Nomor 1 Taong 2025 tentang Redistribusi Guru ASN, malalui katarangang tertulis, Jumat (12/6/2026).
Sekretaris DPD Partai Golkar Provinsi Maluku ini mangaku, salah satu isu yang dapa tanya paleng banya dalam masyarakat itu, batul kah guru ASN yang mangajar di sekolah yayasan mo dapa tarek samua?
“Parlu beta bilang deng tegas, atorang aturan ini bukang kabijakan panarikan massal guru ASN dar sakolah yayasan,” kata Anos Yeremias.
Justru, tabola-bale, alumni SD YPPK Nomaha Kisar ini bilang, akang regulasi terbit par kase kapastian hukum par pamarataan guru deng mo bantu satuan pendidikan yang masih kurang tanaga pandidik, tarmasuk sakolah-sakolah yang masyarakat ato yayasan kas jalang akang.
“Redistribusi itu dapa bikin deng dasar analisis kabutuhan guru yang objektif deng pake basis data. Nah, Pemerentah daerah mo lia kondisi riil di lapangan, jumlah guru yang tasadia, jumlah pasarta didik, deng kabutuhan satiap satuan pendidikan,“ jelas Anos Yeremias.
Deng bagitu, lanjut Anos, seng samua guru ASN yang oras ini mangajr di sakolah yayasan otomatis dapa kas pinda ato dapa tarek ka sakolah negeri.
“Satiap kaputusan musti malalui mekanisme yang dapa atur dalang paraturan parundang-undangan deng mampartimbangkan kapantingan layanan pendidikan par paserta didik,” tandas Anos.
Untuk itu, dia kas inga, tujuan utama kabijakan ini adalah, mawujudkan pamarataan distribusi guru, mangatasi kakurangan guru di satuan pendidikan tartantu.
“Kabijakan ini juga bagemana biking bae mutu layanan pendidikan, manjamin hak satiap anak Indonesia par dapa pendidikan yang pung mutu lebe bae,” papar Anos.
Sabage Anggota DPRD Provinsi Maluku, dia lia implementasi kabijakan ini musti biking akang ati-ati, transparan, deng seng boleh biking rugi ana sakolah mopun sakolah yang salama ini masih parlu guru ASN.
“Tagal itu, katong harap pemerentah daerah biking pandataan yang akurat, koordinasi deng yayasan pendidikan, lalu pastikan satiap kabijakan benar-benar pung orientasi par paningkatan mutu pendidikan,” pesan Anos.
“Par masyarakat, guru, deng pangalola sakolah yayasan, beta imbau jang gampang tapangaruh deng informasi yang balong dapa verifikasi. Mari katong paham akang regulasi deng utuh sahingga seng muncol rasa hawatir yang lebe-lebe,” kata Anos.
Anos bilang, secara prinsip, pendidikan itu tanggong jawab samua. Samua kabijakan yang dapa biking, musti akang pung muara di kapantingan paleng bae par ana didik.
Dia sebut, pemerentah pung regulasi par ator redistribusi ato pamarataan guru bardasarkan kabutuhan riil di lapangan. Akang pung tujuan biking bae mutu layanan pendidikan deng bantu sekolah yang masih kakurangan guru. Tagal itu, akang pung implementasi harus objektif, transparan, deng tetap parhatikan kapantingan ana sakolah deng kabarlangsungan sakolah yang parlu guru ASN.
Dia menegaskan, redistribusi dilakukan berdasarkan data dan kebutuhan riil. Diakui, tidak semua Guru ASN di sekolah yayasan otomatis dipindahkan.
”Pemerentah Daerah biking panataan iko kabutuhan wilayah masing-masing. Kapantingan ana sakolah tetap jadi prioritas utama. Sakolah yayasan yang masih parlu guru tetap jadi parhatian pemerentah,” sebut Anos.
Anos pasang par masyarakat, lebe paham satiap kabijakan secara utuh deng seng gampang tamakang informasi yang balong dapa verifikasi.
“Pendidikan itu tanggong jawab barsama par ciptakan generasi yang cerdas, pung karakter, deng pung daya saing. Barsama bangong Pendidikan Maluku yang majo, marata, deng pung kualitas,” pungkas Anos. (red/merindu)
