AmbonVibes.com – Ketua Komisi I DPRD Provinsi Maluku Solichin Buton bilang deng tegas, samua Warga Negara Asing (WNA) yang ada biking dong pung aktivitas di Maluku wajib iko atorang kaimigrasian, deng katentuan hukum yang barlaku.
Panagasan itu dia sampekan takait parhatian tarhadap kabaradaan sajumlah WNA, tarmaso yang biking aktivitas di kawasan pertambangan Gunung Botak, Kabupaten Buru.
“Pemerintah wajib pastikan samua WNA di Indonesia, par iko paraturan kaimigrasian dan katantuan hukum yang barlaku,” tegas Solichin, waktu dapa tahubung dar Ambon, Jumat (5/6/2026).
Solichin bilang, WNA yang pung dokumen lengkap, dan izin kabaradaan yang sah pung hak dapa parlindungan hukum, sabagemana dapa ator dalang paraturan parundang-undangan.
Mar, par dong yang tabukti biking palanggaran, aparat yang pung wewenang harus ambe langkah panindakan tegas iko katantuan yang barlaku.
“Pemerintah musti pastikan, samua WNA di Indonesia iko atorang yang barlaku. Bagi yang pung dokumen langkap deng sah, dia pung hak harus dapa jamin. Mar yang langgar katantuan, musti dapa tindak tegas iko hukum yang barlaku,” kata Solichin.
Manurut dia, parsoalan kabaradaan WNA seng cuma barkaitan deng aspek investasi ato aktivitas ekonomi samata, mar juga manyangkut kapatuhan tarhadap sistem hukum, deng kadaulatan negara.
Tagal itu, pangawasan tarhadap pargarakan orang asing, bae yang maso mopun kaluar wilayah Indonesia, musti maksimal deng barkalanjutan.
“Beta minta Kantor Imigrasi par kas kancang pangawasan tarhadap kaberadaan orang asing di Maluku,” pinta Solichin.
Langkah ini dia nilai panting, par mancagah panyalahgunaan izin tinggal mopun visa kunjungan, par aktivitas yang seng sasuai deng tujuan kadatangan, yang tarcantum dalang dokumen.
Dia bilang, parlu paskali pangawasan yang tarus-manarus, tarutama di tampa-tampa yang pung aktivitas ekonomi tinggi, deng jadi tujuan kadatangan banya tanaga karja asing mopun aupun investor dar luar negeri.
“Jangan sampe ada panyalahgunaan izin tinggal, ato pake visa wisata par karja atau aktivitas laeng yang langgar katantuan. Hal ini musti jadi parhatian serius samua pihak,” ujar Solichin.
Par dukung efektivitas pangawasan, Solichin mandorong palaksanaan operasi, deng pamariksaan dokumen keimigrasian secara berkala.
Kagiatan itu, manurut dia, perlu biking deng tarpadu, deng melibatkan barbage instansi takait, par hasil yang mo dapa, akang lebe maksimal deng manyaluruh.
Salaeng itu, DPRD Provinsi Maluku juga buka kamungkinan par pangge pihak Kantor Imigrasi, par minta panjalasan resmi, takait mekanisme pangawasan dan pananganan WNA di Maluku.
“Langkah ini sabage bageang dar palaksanaan fungsi pangawasan DPRD tarhadap kinerja instansi pemerentah,” sebut Solichin.
Manurut dia, Komisi I deng Komisi III DPRD Provinsi Maluku pung kawenangan konstitusional, par minta katarangang dar pihak takait, par pastikan sistem pangawasan kaimigrasian bajalang iko atorang, deng sondor ada celah palanggaran yang dapa kas lewat.
“Parlu ada panjelasan resmi dar pihak Imigrasi, manganae mekanisme pangawasan tarhadap WNA, yang salama ini bajalang. DPRD nanti minta katarangang, par parsoalan ini bisa dapa handel sampe klar, seng bale jadi masalah hukum maupun sosial, eso-eso,” tegas dia.
Solichin harap, sinergi Kantor Imigrasi, pemerentah daerah, aparat keamanan, dan samua pamangku kapantingan tarus dapa kas kancang.
Akang pung tujuan mo pastikan kaberadaan WNA di Maluku kase manfaat ekonomi yang nyata, deng seng bawa dampak negatif ato konflik di tengah masyarakat,” tandas Solichin Buton. (Red/Merindu)
