AmbonVibes.com – Ketua DPRD Provinsi Maluku Benhur George Watubun manilai, anana muda pung rol paleng strategis par manjaga, deng manaruskan nilai-nilai Pancasila di tengah parubahan zaman yang su lebe capat.
Benhur ajak anana muda Maluku par biking kuat karakter kabangsaan, marawat toleransi, deng jaga parsatuan sabage modal par bangong daerah deng bangsa.
Benhur bicara samua itu waktu dapa tasambung dar Ambon, Senen (1/6/2026), pas paringatan Hari Lahir Pancasila. Manurut Benhur, Pancasila bukang sakadar dasar negara ato dokumen sejarah yang dapa paringatang sabang taong, malaengkang p ideologi yang samua musti hayati deng amalkan akang dalang perilaku masyarakat, tarutama anana muda yang eso-eso jadi panentu masa depan bangsa.
“Hari Lahir Pancasila musti jadi momen refleksi par saluruh putra-putri bangsa, lebe khusus anana muda Maluku, par paham bahwa kebaragaman yang katong punya, akang jadi satu kakuatang. Pancasila ajar katong hidop dalang parsaudaraan, hargai parbedaan, deng bakarja barsama par kamajuan daerah mopun bangsa,” ujar Benhur.
Dia bilang, tantangan yang anana muda dapa akang sakarang su laeng paskali kalo mo banding akang deng tempo sabalong ini.
Parkambangan teknologi informasi, arus globalisasi, deng panaebaran informasi di media sosial yang kancang manuntut anana muda pung kamampuan bapikir kritis, par seng gampang tagoda Deng informasi yang biking ilang jalang.
Benhur manilai, Pancasila pung nilai-nilai masih tetap relevan, par jadi padoman par tangada barbage dinamika kahidupan modern.
Sikap toleransi, masohi, keadilan sosial, deng panghormatan tarhadap harkat deng martabat kamanusiaan musti tarus dapa jaga dan bawa akang dalam praktek hidop masyarakat.
“Di era digital macang oras ini, anana muda musti jadi agen parsatuan, bukang panyebar kabencian. Pake media sosial par sebar hal-hal positif, kas kuat tali parsaudaraan, deng tarus promosi potensi daerah. Jang gampang dapa makang cabar deng isu-isu, yang bisa kas pica parsatuan masyarakat,” kata Benhur.
Dia juga kas inga samua par jaga samangat Pela Gandong sabage warisan budaya yang salaras deng nilai-nilai Pancasila.
Manurut Benhur, budaya hidop orang basudara yang su lama batumbuh dan hidop di Maluku marupakan modal sosial yang paleng barharga, pas kas lebe kuat kahidupan barbangsa deng barnegara.
Benhur bilang, anana muda musti tarus kas kuat kapasitas diri malalui pendidikan, panguasaan teknologi, inovasi, dan kreativitas par mampu barsaing di tingkat nasional moupun global, deng sondor ilang jati diri sabage putra bangsa.
“Katong parlu anana muda yang cerdas pung karakter, pung integritas, deng tetap polo rapat nilai-nilai Pancasila. Kamajuan teknologi musti dong pake par biking karya deng prestasi, bukang apa-apa yang kas rusak haru eso,” tegas Benhur.
Dia harap, paringatan Hari Lahir Pancasila taong 2026 seng cuma seremonial sa, malaengkang musti mampu dorong kasadaran barsama, par amalkan nilai-nilai Pancasila dalang hidop harhari.
“Kalo anana muda Maluku mampu pake Pancasila sabage padoman hidop, Beta parcaya dong mo jadi kakuatang basar dalang mambangun Maluku yang majo, dame, deng sajahtera, lalu iko jaga kautuhan NKRI,” tandas Benhur. (Red/Merindu)
