AmbonVibes.com – Panggung seleksi Jabatan Pimpinan Tinggi (JPT) Pratama Sekretaris Kota Ambon su molai panas. Di tengah dinamika birokrasi, tiga nama tarangka sabage kandidat kuat: Robby Sapulette, Steven Dominggus, deng Apries Gaspersz.
Di lingkungan Balai Kota Ambon, parbincangan soal sapa yang dapa dudu di kadera “Panglima ASN” itu su open-open, seng pake bisi-bisi lai. Parsaingan katiga gaco montar ini molai tabaca sabage partarungan kapasitas, pangalaman, sampe gagasan parubahan dalang tubuh birokrasi Kota Ambon.
Sabagai Palaksana Tugas (Plt) Sekretaris Kota Ambon Robby Sapulette barada di posisi paling strategis. Dia pung kauntungan awal karena su kandali langsung administrasi pamerintahan.
Di kalangan birokrat, Robby dapa nilai sabage figur yang paham sacara detail alur karja deng struktur birokrasi yang samantara bajalang. Faktor kadekatan deng sistem yang ada biking dia sabage kandidat yang cukup menonjol.
Nama laeng yang iko barsaing itu Steven Dominggus. Dia dapa bilang sabage birokrat yang pung kamampuan teknis dan manajerial yang solid, deng gaya karja yang cenderung tenang mar taukur.
Steven kerap dapa bilang sabage tipe pajabat yang bakerja dalang senyap, mar pung hasil karja paleng presisi. Akang rekam jejak biking dia tetap dapa rekeng dalang bursa Sekkot Ambon kali ini.
Kuda Itang deng Gagasan “Payong”
Samantara itu, parhatian publik juga tatuju par Apries Gaspersz, Kapala Dinas Lingkungan Hidup dan Persampahan (LHP) Kota Ambon, yang muncol sabage “kuda itang” dalang kontestasi ini.
Apries mancuri parhatian bukang cuma tagal posisi kandidat, mar juga tagal dia bawa gagasan bagus dalang proses seleksi JPT Pratama. Dia pake metafora “Kas kacil ujang deng kas basar payong”. Dia bilang akang sabage filosofi tata kalola pamerentahan.
“Ujang itu masalah, gangguan, deng konflik. Tugas katong redam akang. Payong itu palayanan publik. Katong musti biking loas parlindungan agar warga dapa rasa aman,” ujar Apries dalang salah satu parnyataan gagasan.
Konsep itu akang dapa nilai sabage upaya manawarkan pandekatan baru dalang palayanan publik yang lebe adaptif deng responsif tarhadap kabutuhan masyarakat.
Sumber di lingkungan Pemerintah Kota Ambon kastau, proses seleksi kali ini akang sangat bargantung hasil assessment yang ketat. Panileang seng cuma di senioritas mar di kacardasan komprehensif dan kapasitas kapamimpinan.
“Kacardasan itu faktor panantu. Dan itu nanti dapa lia di hasil seleksi nanti,” ungkap salah satu sumber internal.
Meski Robby Sapulette dapa bilang unggul karena posisi oras ini, kahadiran Steven Dominggus dan Apries Gaspersz biking peta parsaingan jadi lebe tabuka deng dinamis.
Dinamika bursa Sekkot Ambon ini sakaligus kas unju ada harapan parubahan dalang tubuh birokrasi. Partarungan seng samata-mata soal senioritas, mar soal kamampuan manjadi eksekutor kabijakan yang efektif dan bardampak par masyarakat.
Sakarang, publik mananti sapa yang paleng mampu mayakinkan tim seleksi bahwa dia layak jadi “panglima ASN” Kota Ambon di tengah tuntutan reformasi birokrasi yang samakin tinggi. (red)
