AmbonVibes.com – Wali Kota Ambon Bodewin Wattimena bilang, Musyawarah Perencanaan Pembangunan (Musrenbang) Rencana Kerja Pemerintah Daerah (RKPD) Taong 2027 musti bisa jawab barbage tantangan yang oras ini warga Kota Ambon ada tangada akang.
Wali Kota Bodewin bilang akang waktu buka Musrenbang RKPD di Kamari Hotel, Ambon, Kamis (9/4/2026).
Wali Kota sebut, Musrenbang bukang sakadar agenda rutin pemerentah, malaengkang forum panting yang akang pung dampak musti masyarakat dapa rasa langsung.
“Paleng kurang, akang kas inga katong samua bahwa ada hal panting yang musti katong pikir, rancana, par biking bae-bae taong muka, tagal kagiatan ini panting bukang cuma par Pemerentah mar juga samua warga kota ini dapa rasa akang,” ungkap Bodewin.
Dalang panyusunan RKPD 2027, Bodewin minta parangkat daerah lebe carmat manantukan prioritas pambangunan. Dia sebut beberapa hal panting yang musti jadi parhatian utama.
“Prioritas katong ada 17, balong lai di luar itu. Tagal itu, pilih jua yang paleng bawa dampak tarhadap situasi katong hari ini dan taong 2027,” tambah Bodewin.
Dia ure, paleng sadiki ada tiga pandekatan utama dalang panyusunan RKPD, yaitu:
- Prioritas terarah, deng pilih program yang paling bawa dampak langsung par masyarakat
- Dorongan inovasi, deng barani biking tamrobosan dalang palaksanaan program
- Panguatan kolaborasi, kas iko swasta, pangusaha, deng barbage pihak kompeten par pambangunan kota.
Wali Kota harap Musrenbang RKPD 2027 bawa barbage gagasan baru yang konstruktif par arah pambangunan Kota Ambon ka depan.
“Harapan tarakhir adalah akan lahir barbage gagasan, masukan, deng perspektif baru yang bisa biking kaya arah kabijakan pambangunan kota ini ka depan deng samangat kabersamaan dan kolaborasi,” ujar Wali Kota.
Dia managaskan, kakuatan utama pambangunan Ambon terletak pada sinergi samua pihak par wujudkan kota yang maju, inklusif, toleran, deng barkalanjutan. (Keket)
