AmbonVibes.com – Ka mana sa di unjung dunya, orang-orang Maluku salalu seng lupa dong pung akar budaya. Bae itu makanang, pakeang, bahasa deng logat, adat, deng sagala macang budaya yang jadi dong pung identitas.
Su biasa, kabar tasiar dar saluruh dunya manganae orang Maluku yang menonjol di panggung hiburan. Di tanah aer, seng bisa rekeng. Di Balanda, satu abis satu. Mar kali ini, kabar bae datang dar Negeri Kanguru, Ostrali.
Bukang kabatulang aktivis LSM Internasional Marie de Fretes ada lanjut studi di Melbourne. Juga bukang tagal musisi Nico Tulalessy ada pasiar ka sana. Mar di Melbourne, su ada orang-orang Maluku yang eksis.
Dong bawa kabiasaan dari kampong halaman, suka kumpul basudara, laeng lia laeng, deng mulai brekeng par biking apa-apa.
Dari Melbourne, Nico Tulalessy bacarita par AmbonVibes.com, dia ada bakudapa sakumpul orang Maluku yang biji ruku smua di dong pung bidang.
Nico kastau dia bakudapa kumpulan Maluku Basudara Melbourne (MBM). MBM pung Katua nama Ina Siwabessy.
Ina sanang paskali bakudapa Nico, tagal ternyata sama-sama suka musik tradisi jukulele. Ina carita par Nico, dong pung kalompok Jukulele Maluku Basudara Melbourne su tabantuk ahir taong 2019. Dong molai deng dalapang personil mar tagal kasibukang, ada lima yang paleng aktif sampe oras.
Jukulele MBM paleng samangat. Bahkan waktu pandemi covid 2020, MBM latihang Kuti jukulele sacara online.
“Katong pung palatih Bung Decky Nanere, musisi Maluku di Melbourne. Katong belajar jukulele dar Bung Decky,” bagitu carita Ina vor Nico.
Ina bilang, kamuka-kamuka waktu dong biking grup jukulele, dong molai deng kurang-kurang. Kurang orang, kurang ukulele, kurang waktu latihan, bahkan kurang parcaya diri.
Mar sairing bajalang waktu, deng Bung Decky Nanere pung samangat par bajalang sama-sama, jukulele MBM su lebe parcaya diri. Dong su dapa pake par acara-acara internal MBM mopun undangan dar luar MBM.
Jadi, manurut Ina Siwabessy, salaeng di acara Natal deng Halal Bi Halal MBM, juga Pattimura Day, MBM tampil lai di acara komunitas laeng di Melbourne macang Bona Taon, Kawanua Konci Taon, Festival Indonesia, Tembang Nusantara dan Indonesian Street Food Festival.
Bahkan manurut Ina Siwabessy, su tiga kali barturut-turut Jukulele MBM dapa undang maeng di Indonesian Street Food Festival. Tantu, MBM bawa lagu-lagu Maluku deng maeng jukulele.
“Katong salalu bawa lagu Maluku yang su familier di talingan macang lagu Papeda Dinging, ato lagu Hasil Maluku, dan bae paskali dapa tarima di talingan panontong.
Ina Siwabessy mangaku paleng sanang tagal baku dapa deng dapa latihan jukulele dar Nico Tulalessy.
“Sanang Bung Nico Tulalessy bisa latih katong deng kase arahan, kase pangalaman baru biking katong sumangat kumbali,” ungkap Ina.
Ina harap, jukulele MBM tetap eksis dan terus kas kanal musik Maluku di tengah masyarakat Ostrali. Sebaliknya, Ina harap lai, basudara pamaeng Jukulele di Maluku, lebe-lebe anana pranggang tarus jaga budaya Maluku.
“Salaeng par ikon Ambon sabage City of Music, harap pamaeng jukulele Maluku bisa jadi musisi dunya,” kata Ina.
Nico Tulalessy kase jari mai par musisi jukulele MBM samua, lebe-lebe Ina Siwabessy yang pimpin deng Decky Nanere yang latih, samua musisi MBM su jaga nama Deng budaya Maluku di tanah orang, Melbourne, Ostrali. (Rudi Fofid)
