AmbonVibes.com – Nama bakas Kapala Dinas PUPR Provinsi Maluku Ismail Usemahu taseret aros taputar parkara dugaan korupsi proyek pambangunan ruas Jalang Danar-Tetoat di Kabupaten Maluku Tenggara. Penyidik Polda Maluku su fiks kase status tarsangka.
Salaeng Ismail Usemahu (IU) yang maeng rol sabage Kuasa Pangguna Anggaran (KPA), panyidik juga kase status tarsangka par MT salaku Pajabat Pembuat Komitmen (PPK), RT sabage Pajabat Palaksana Teknis Kegiatan (PPTK), deng NP sabage Direktur CV Jusren Jaya yang jadi palaksana proyek.
Direktur Reserse Kriminal Khusus Polda Maluku Piter Yanottama kastau, ampa tarsangka pung rol kunci sampe jadi panyimpangan proyek yang biking rugi kauangan nagara.
“Bardasarkan hasil pamariksaan deng alat bukti yang katong punya, ada ampa pihak yang paleng bartanggung jawab par karugian keuangan nagara,” ujar Piter, Rabu (8/4/2026).
Proyek pambangunan Jalan Danar–Tetoat sandiri marupakan kagiatang yang barsumber dar Dinas PUPR Provinsi Maluku taong anggaran 2023, deng nilai kontrak awal Rp7,13 miliar.
Dalang parjalanan, kontrak barobah (addendum), 8 Juni 2023, jadi akang pung nilai nae sampe Rp7,2 miliar, deng masa palaksanaan 210 hari kalender.
Mar dalang palaksanaan, akang proyek seng dapa karja akang iko spesifikasi teknis mopun waktu yang su spakat akang.
Lebe soe lai, pambayaran proyek su caer sampe 100 parsen.
Temuan ini dapa kas kuat deng hasil audit Badan Pemeriksa Keuangan (BPK) yang ungkap ada karugian nagara sabasar Rp2,8 miliar.
Polda Maluku deng tegas mo tarus sidik, deng tatap tabuka kamungkinan pihak laeng dapa minta tanggongjawab hukom.
“Pangembangan parkara tatap bajalang. Kalo ada bukti baru, mungkin paskali ada panambahan tarsangka,” tegas Piter Yanottama.
Parkara ini tanae, biking inga samua soal pangawasan katat tarhadap proyek infrastruktur daerah, sakaligus jadi paringatan par saluruh pihak par kalolola anggaran negara sacara transparan deng akuntabel. (Tim)
