AmbonVibes.com — Orang-orang Sarane di Kota Ambon manyambut Hari Kebangkitan Yesus Kristus (Paskah) deng sukacita. Tradisi pawe obor dan prosesi Jalang Salib Hidop. Akang bajalang deng khidmat, Minggu (5/4/2026) amper siang.
Ribu-ribu orang Sarane di barbage titik, turung ka jalang. Salah satu paleng rame akang di Jemaat GPM Passo Utara, Klasis Pulau Ambon Timur. Di sana, rangkeang parayaan dong buka deng barbage kagiatan kreatif yang kas iko anana sampe orang dawasa. Abis itu baru ding rake akang deng pawae obor sabage simbol tarang kabangkitan Kristus.
Abis pawe obor, umat iko ibadah “Kubur Tabuka”, yang jadi momen penting dalang parayaan Paskah. Ibadah ini mo deng tegas par unju kayakinan iman bahwa Yesus Kristus su bangkit dan seng ada lai dalang kubur.
Salah satu warga, Olan, mangaku barsyukur bisa kumbali rayakan Paskah taong ini.
“Kabangkitan Kristus jadi jaminan ada kahidopang sasudah kamatian. Ini juga lambang kamanangan kahidopang atas kamatian, deng tarang atas kagelapan,” ujar Olan.
Salaeng pawe obor, suasana religius juga dapa rasa paleng kuat di sapanjang Jalan Pattimura, Kecamatan Sirimau. Ribu-ribu warga biking padat kiri-kanang jalang par lia drama prosesi panyaliban Yesus Kristus, yang Jemaat GPM Syaloom Batu Meja Ambon biking akang. Dong kolaborasi deng Paduan Suara Ora Et Labora.
Prosesi mulai dar Gareja Maranatha sakitar jam 01.00 WIT dan akang pung ujung di muka Gapura Syaloom Batu Meja jam 02.45 WIT. Sapanjang rute Via Dolorosa, suasana tarasa dramatis, terutama saat adegan cambok dar prajurit Romawi yang biking emosi panontong.
Sabanyak 59 orang bawa rol dalang pamantasan ini. Dong maeng abis, par kas bale ingatang par kisah panyaliban Yesus secara detail dan manyantuh.
Katua Paduan Suara Ora Et Labora Non Tatipikalawan bilang, kagiatan ini bukang sakadar partunjukan.
“Ini bukan carita fiktif, mar kisah nyata yang kas hadir kumbali. Jadi, jang cuma nontong malaengkan musti rasa, tarutama par umat Sarane,” ujar Non Tatipikalawan.
Non bilang, satiap adegan dalang prosesi ini akang pung tujuan manggugah kasadaran umat akang pangorbanan Yesus Kristus yang bagitu basar par kasalamatan manusia.
Manurut dia, panderitaan yang tagambar dalang jalang salib jadi simbol kasih dan pangorbanan yang musti tarus kas hidop dalang kahidopang sahari-hari, tarutama oleh generasi muda.
Kagiatan kontemplasi Jalang Salib ini marupakan yang partama kali Paduan Suara Ora Et Labora biking akang, sabage bantuk inovasi par biking lebe dalang refleksi iman jemaat.
Saluruh rangkaeang kegiatan ini marupakan hasil kolaborasi antara Paduan Suara Ora Et Labora deng Panitia Hari-Hari Besar Gerejawi (PHBG) Jemaat GPM Syaloom Batu Meja.
Parayaan Paskah taong ini pun samua harap seng cuma jadi tradisi sabang taong, mar juga juga jadi momentum par biking bae iman, kas erat hidop orang basudara, deng kas hadir nilai kasih deng dame dalang kahidupan barmasyarakat. (Tim)
