AmbonVibes.com – Katarbatasan lahan Tempat Pemakaman Umum (TPU) par umat Salam di Kota Ambon jadi parhatian sarius Komisi I DPRD Provinsi Maluku. Komisi mandorong parcapatan solusi malalui koordinasi deng barbage pihak takait.
Katua Komisi I DPRD Provinsi Maluku Solichin Buton, har Rabu (1/4/2026) ada pimpin rapat di Ruang Komisi I DPRD Maluku. Komisi undang Majelis Ulama Indonesia (MUI) Provinsi Maluku, Pemerentah Kota (Pemkot) Ambon, deng Pemerentah Provinsi (Pemprov) Maluku.
“Parsoalan katarbatasan lahan pamakaman su ada di kondisi mandesak, deng seng bisa tunda lai,” tegas Solichin.
Dia sebut, amper samua Kubur Islam di Kota Ambon su pono, bahkan dalang praktik, satu liang kubur su isi lebe dar satu jenazah.
Rapat komisi ini marupakan tindak lanjut partemuan yang kamuka biking Januari 2026 lalu, setelah MUI kas maso surat resmi, takait kabutuhan lahan pemakaman yang su lebe mandesak.
Komisi I langsung maeng rol sabage mediator, par dorong solusi barsama Pemkot Ambon deng Pemprov Maluku. Dalang forum itu, pemerentah daerah siap mandukung.
DPRD Maluku pun stressing soal kolaborasi lintas pihak, akang paleng panting par lakas kubur Islam yang layak bisa capat tasadia.
Ketua MUI Provinsi Maluku Abdullah Latuapo bilang, kondisi di lapangan su paleng mamprihatinkan.
“Sajumlah lokasi pamakaman macang Kebun Cengkeh dan Warasia seng mampu lai par tampung jenazah,” beber Abdullah Latuapo.
Dia bahkan kase contoh kasus, seorang tokoh Salam sempat susah par pamakaman tagal lahan seng ada sampe akhirnya tanang di halaman rumah kaluarga.
“Sabagai langkah konkret, MUI su sadia lahan saluas 3 hektare, yang mo jadi TPU baru,” kata Latuapo.
Lahan itu pung sertifikat su ada, deng pambayaran uang muka Rp500 juta dar total nilai sakitar Rp6,8 miliar. Akses manuju lokasi juga su tasedia, deng Pemkot Ambon su karja sabageang.
Mar proses panyediaan lahan itu masih parlu dukungan pambiayaan lanjutan. Tagal itu Latuapo harap, ada katarlibatan aktif Pemprov deng Pemkot par biking lunas harga lahan kubur Islam yang baru.
Wali Kota Ambon Bodewin Wattimena bicara dampak lahan yang minim tarhadap barbagai sektor, tarmasuk panyadiaan fasilitas pamakaman umum par warga, khususnya umat Salam.
Bodewin managaskan, wilayah kota tambah padat biking sajumlah program sulit tarealisasi. Tagal itu, parsoalan ini dia nilai par pananganan lintas sektor, bukang cuma pemerintah kota sandiri.
“Sabagai langkah awal, Pemkot Ambon buka ruang karja sama deng barbage pihak. Salah satu inisiatif datang dar MUI Provinsi Maluku yang su upara pangadaan lahan pemakaman, dan su dapa dukungan Pemkot Ambon,” sebut Wali Kota Bodewin.
Par kas capat akang pung proses, Bodewin bilang Pemkot Ambon su kase kamudahan administrasi barupa pambebasan Bea Perolehan Hak atas Tanah dan Bangunan (BPHTB). Kabijakan ini dia harap bisa kas haringan beban deng kas capat realisasi lahan kubur Islam yang baru.
Maski bagitu, pangadaan lahan balong rampung batul, tagal masih ada sisa pambayaran yang parlu biking lunas akang.
“Pemkot Ambon pastikan akan sadia skema pambiayaan, par lahan itu lakas bisa pake,” kata Bodewin.
Deng posisi Ambon sabage aktivitas masyarakat Maluku, Bodewin manilai, panyediaan fasilitas publik macang pamakaman musti jadi tanggung jawab barsama, malalui kolaborasi lintas pihak. (red/merindu)
