AmbonVibes.com – Akang organisasi lingkungan yang pung nama beken Green Moluccas tarus kas kuat dong pung komitmen. Dong mau tarus piara kalastarian ekosistem pinggir pante di Maluku malalui aksi barsih-barsih pante di barbage tampa sondor stop.
Kapala Divisi Enterprise Green Moluccas Geofani Lopulisa kastau, amper sabang bulang dong angka kotorang. Soalnya, ancaman kotorang domestik di kawasan pinggir pante tamba nae.
“Intensitas kagiatan ini katong biking amper saban bulang di sajumlah lokasi strategis, tarutama di pinggir pante Kota Ambon,” ujar Geofani, dikutip dari laman rri.co.id, Minggu (22/3/2026).
Aksi barsih-barsih Green Moluccas pilih sajumlah tampa antara laeng Hative Besar deng satu dua tampa laeng di dalang Kota Ambon.
Dalang satiap aksi, relawan barhasil kumpol kotorang deng volume paleng sadiki 53 kilogram. Jenis kotorang yang dapa kompol akang macang-macang, molai dar kaleng besi, residu, sampe plastik yang masih pung nilai ekonomis par daur ulang.
Langkah ini sabagai bantuk kalesang tarhadap kondisi lingkungan yang tamba lebe tarancam tagal pancamaran limbah rumah tangga.
Seng cuma fokus di aksi lapangan, Green Moluccas juga biking program pendidikan lingkungan par tanang kas batumbu kasadaran masyarakat, molai dar anana yang masih kacupeng alus.
Malalui program Sekolah Alam dan Bengkel Kreatif, Green Moluccas kase masyarakat kasadaran par jaga ekosistem deng ubah cara pandang tarhadap sampah.
“Malalui edukasi ini, katong mo ubah paradigma bahwa sampah bukang akhir dar sasuatu barang, mar bisa jadi awal dar sasuatu yang pung nilai kalo mo kalola sacara kreatif,” kata Geofani.
Dalang manjalankan dong pung misi, Green Moluccas juga kas majo kolaborasi lintas sektor deng kas iko pemerintah, akademisi, media, sampe komunitas lokal.
Manurut Geofani, sinergi jadi kunci dalang mandorong kabijakan yang barkalanjutan sakaligus biking luas dampak gerakan palastarian lingkungan di Maluku.
Pamanfaatan barang bakas macang botol, kartas, deng kardus par daur ulang jadi salah satu fokus utama dalang upaya manjaga lingkungan tatap barsih.
Deng usung samangat “Sampah Bukan Akhir”, Green Moluccas tarus bagara ajak masyarakat par lebe bijak kalola limbah, par jaga kalastarian alam di bumi Raja-Raja. (red/kbrn)
