AmbonVibes.com – Wakil Katua DPRD Provinsi Maluku Johan Johanis Lewerissa bilang, bulan suci Ramadan bukan cuma par tamba lebe banya ibadah, mar juga kasampatan biking rapat hubungan orang basudara deng kas batumbu solidaritas dan kapadulian sosial di dalang masyarakat.
Johan bilang bagitu waktu biking kagiatang reses, tasambong deng buka puasa barsama warga Dusun Wailela Pante, Negeri Rumahtiga, Kacamatan Teluk Ambon, Salasa (10/3/2026) sore.
Acara baku dapa warga barlangsung paleng akrab antara Johan deng warga. Samua ini par biking bagus suasana kaamanan deng katartiban lingkungan salama bulan Ramadan. Deng bagitu, umat Salam nisa ibadah deng sagala bae.
“Kabarsamaan deng sikap baku hormat laeng deng laeng jadi kunci suasana dame di dalang kahidupan masyarakat,” kata Johan.
Salaeng buka puasa barsama, kagiatan itu juga par Johan pake stori-tori deng warga par timba barbage aspirasi warga Wailela Pante.
Manurut Johan, reses jadi kasampatan panting par wakil rakyat dudu dengar langsung kabutuhan deng parsoalan dalang masyarakat akar rumput .
Johan bilang, dia mo tarus parjuangkan barbage aspirasi warga, tarutama yang takait deng pambangunan daerah deng paningkatan kasajahteraan masyarakat di kawasan Teluk Ambon.
Dalang kasampatan yang sama, Johan juga bage-bage bantuan sosial par warga yang parlu akang. Ada sakitar 100 paket sembako dapa kase par janda, duda, deng warga lanjut usia di Wailela Pante.
Seng cuma itu, anana yatim piatu juga dapa bantuan barupa uang saku sabage bantuk parhatian par anana dong.
Manurut Johan, kagiatang barbage macang ini marupakan wujud nyata kapadulian tarhadap masyarakat, lebe khusus di bulan Ramadan yang identik deng samangat kabarsamaan dan solidaritas sosial.
Kagiatang itu turut dihadiri anggota DPD RI Novita Anakotta. Novita adalah istri Johan. Waktu laki-bini ini muncol di sana, warga manyambut deng gambira. Lebe-lebe lai, dua wakil rakyat ini juga warga Negeri Rumahtiga, sama deng warga Wailela Pante. (Leo)
