AmbonVibes.com – Wali Kota Ambon Bodewin Wattimena mangajak jamaat Gereja Protestan Maluku (GPM) di Klasis Kota Ambon par iko bangong sinergi par tongka barbage parsoalan sosial yang biking resah masyarakat di ibu kota Provinsi Maluku.
Wali Kota Bodewin bilang akang waktu kase kata sambutan di Pambukaan Sidang ka-50 Klasis GPM Kota Ambon di Gareja Josep Kam Jemaat Bethel, Minggu (8/3/2026).
Dalang sambutan itu, Bodewin kastau, parsoalan sampah di Kota Ambon seng bisa cuma deng kas tamba infrastruktur ato sarana prasarana dar pamarentah. Manurut Bodewin, kasadaran masyarakat jadi faktor utama dalang manyalasaikan parsoalan sampah.
“Kalo sondor ada kasadaran masyarakat, sagala upaya pamaretah akang jadi parcuma. Pamarentah tarus kas bae kapasitas, kas nae infrastruktur dan kualitas SDM. Mar katong parlu dukungan masyarakat par dua hal saja yaitu buang sampah di akang pung tampa, deng buang sampah iko akang pung waktunya. Kalo biking akang bagitu, Katong bisa biking abis masalah sampah,” ujar Bodewin.
Salaeng parsoalan sampah, Bodewin juga bilang masalah kesehatan yaitu kasus HIV/AIDS di Kota Ambon yang biking hati susah.
Bodewin kastau, dalang kurun waktu dua bulan laste ini, ada lebe 60 orang yang tajangke HIV/AIDS di Ambon.
Bodewin juga kas lurus stigma negatif yang muncul di media sosial yang maeng tuding orang dagang panyabab kasus HIV/AIDS di Ambon tanae.
“Bardasar hasil razia rutin yang katong biking, fakta di lapangan kas unju fakta yang seng sama. Pengidap itu orang Ambon mopun Maluku sandiri. Ini kanyataan yang paleng biking hati susah,” ungkap Bodewin.
Dia harap Sidang ka-50 Klasis GPM Kota Ambon seng cuma jadi agenda rutin gareja, mar mampu biking kaputusang strategis yang bisa jadi dalang jamaat deng masyarakat.
Dalang Pambukaan Sidang Klasis, sajumlah orang basar ada hadir, antara laeng Wakil Sekretaris Umum MPH Sinode GPM Max Takaria, Asisten Administrasi Umum Sekda Maluku Dominggus N. Kaya, Ketua DPRD Kota Ambon Morits Tamaela, deng delegasi dar 21 jamaat di lingkungan Klasis GPM Kota Ambon. (red)
