AmbonVibes.com – Oma Elegia Maria Betaubun su umor 68 taong. Oras ini Oma deng Opa Yunus Siahaya ada di Jayapura, Papua. Satu dua hari lai, ada satu cucu mo kaweng di sana. Mar Oma deng Opa su putus, lakas bale Kei jua. Soalnya Oma deng Opa dapa tau, cucu kandung Masias Victoria Siahaya ada kana parkara hukom di Tanah Larvul Ngabal.
Tagal Oma Betaubun pung masalah takotang katinggian, Oma seng mo nae pasawat. Oma mo nae Kapal Pelni, par bale Kei. Di Jayapura, Oma hati susah, manangis tarus bagitu dapa tau cucu brimob dapa masalah.
Oma pung ana laklaki carita par AmbonVibes.com kamareng, Oma paleng sayang Cucu Mesias. Apalai waktu Mesias maso Brimob lalu dapa panampatan ka Kapulauan Aru, Mesias minta pindah ke Kei.
“Beta tugas di Kei jua supaya bisa jaga Oma Elegia pung tampa putus pusa,” kata Masias, taong 2023 lalu, sabagemana dicaritakan ayah Masias di Ambon.
Di Kei, manurut Masias pung papa, dia pung ana laklaki salalu samangat deng bangga ada darah Betaubun Ohoiel mangalir dalang dia pung diri.
“Katong tapukol deng masalah ini, mar bae jua dalang tahanan Polres Tual, katong pung kaluarga Ohoiel ada datang lia dia. Om JU Rahail deng laeng-laeng ada lia-lia dia,” kata Masias pung papa.
KACEWA KAPOLRES TUAL
Mesias pung papa mangaku kacewa deng Kapolres Tual, tagal Kapolres sandiri yang minta bantuan BKO par kas bubar balap-balap liar. Tagal itu Brimob patroli dar malang sampe pagi.
Manurut pangakuan Masias ka dia pung papa, waktu dua pangandara sapeda motor laju-laju kamari, Masias yang ada buka helm dar kapala loko helm itu lalu lambe-lambe akang par kas kode.
“Mar ana di bawa umor tantu seng mangarti mana kode brenti, mana kode jalang palang-palang. Jadi korban tabrak helm sampe jatuh, bukang Masias pukol kas jatuh. Kalo pukol, ya korban jatuh di tampa dapa pukol. Mar ini, helm kana pelipis, lalu korban ilang kandali, sampe jatuh tabrak kakaknya di muka,” kata Papa Masias.
Manurut Papa Masias, dalang sidang kode etik, tidak ada saksi yang lia Masias pukol korban. Kakak korban jua seng lia tagal dia pung motor di muka korban.
Dia kacewa Kapolres Tual tagal cuma dalang lima jam su kas nae status Masias sabage tarsangka. Padahal, Masias dkk patroli bagadang sampe pagi tagal parenta Kapolres.
“Masias sedang tugas bela negara deng masyarakat atas parenta Kapolres. Lalu su bagini, Kapolres yang kase parentah ada di mana?” Begitu kata Papa Masias.
Sidang etik su putus Masias dapa brenti sondor hormat. Masias masih pung kasampatan par nae banding, salama lima hari dari hari putusan etik, PTDH. Mar Masias masih pikir-pikir, mo banding ato seng banding. (Opa)
