AmbonVibes.com — Arianto Tawakal baru umor 14 taong. Dia kalas IX di Madrasah Aliyah Negeri (MAN) Maluku Tenggara. Dia pung kakak, Nasri Karim (15), seng parnah sangka. Dong dua nae motor baku gonceng lewat jalan muka RSUD Maren Kota Tual, itu jadi parjalanan tarakhir.
Akang pung carita, har Kamis (19/2/2026), Arianto Tawakal deng Nasri Karim nae motor. Dong dua lewat di muka RSUD Maren, lalu dapa kas barenti dar oknum Brimob Pelopor C Tual, bilang-bilang saja dia nama “Om Jago”.
Om Jago langsung pukul Arinto pake helm sampe Arianto jatuh dar atas motor. Nasri juga jadi korban, dia pung tangang patah.
“Waktu itu, Om Brimob itu balumpa lalu pukul almarhum pake helm,” ujar Nasri di rumah duka.
Manurut Nasri, abis dapa pukul, Arianto jatuh deng posisi manyamping, lalu taseret di jalang. Sepeda motor yang masih melaju tindis dia.
“Korban masih sadiki sadar, mar su kaluar darah dar mulu deng idong, juga tatoki bageang balakang kapala,” jelas Nasri.
Nasri bilang, ada Om Jago pung tamang anggota Brimob yang laeng ada tagor Om Jago “Mangapa pukol pake helm,” ujar anggota Brimob itu.
Manurut Nasri, dia deng Arianto dapa bawa ka rumah saki. Mar Nasri rasa seng sanang tagal Om Jago paksa dong dia par mangaku ini samua tagal balap liar.
“Oknum Brimob itu tarus paksa par mangaku itu balapan, mar beta bantah karena saat itu jalan manurun, otomatis motor laju,” kata Nasri.
Nasri mangaku paleng manyasal cara aparat bawa Adrianto ka kandaraan dinas. Korban dalang kondisi luka parah tapi dapa angka deng cara seng bae.
“DOng tarek almarhum macang binatang. Seng polo gendong, mar tarek dar balakang ka dalang mobil deng posisi manyamping,” tutur Nasri.
Arianto sempat dapa rawat di RSUD Karel Sadsuitubun Langgur, mar tagal luka sarius abis dapa aniaya, dia pung nyawa seng dapa tolong. Dia maninggal dunya jam 13.00 WIT.
PROSES HUKUM
Katua Kerukunan Keluarga Keturunan Arab (K3A) Moksen Ali deng hati sedih, mangecam karas panganiayaan tarhadap ana pranggang ini. Dia minta palaku dapa proses hukum.
“Katong paleng prihatin deng kajadian ini. Korban seng dapa bina, justru dapa aniaya tanpa salah. Katong minta palaku dapa proses hukum iko undang-undang yang barlaku. Katong mo kawal kasus ini sampe proses hukum,” tegas Moksen Ali.
Sampe berita ini nae, pihak barwenang balong kase keterangan resmi takait dugaan katerlibatan oknum Brimob dalang paristiwa ini. (Vera)
