AmbonVibes.com – Wali Kota Ambon Bodewin Wattimena kase arahan par samua ASN takait rencana gerakan tambahan “Kota Ambon Bersih Nyaman”. Arahan itu, pas waktu apel pagi di Kintal Balai Kota, Rabu (18/2/2026).
Dalang arahan, Wali Kota Bodewin bilang, gerakan kebersihan dan penghijauan marupakan bageang dar program pemerentah pusat yang musti kas jalang akang di daerah. Pemkot Ambon su sadia gerakan tambahan deng judul “Kota Ambon Bersih Nyaman” sebagai.
“Presiden su kase arahan par samua program strategis nasional musti biking sampe ka daerah deng sonto masyarakat. Jadi Pemkot Ambon musti ambe langkah nyata par dukung akang,” ujar Bodewin.
Dia tegaskan, gerakan ini seng cuma jadi program seremonial, mar musti jadi aksi nyata yang malibatkan saluruh parangkat daerah deng masyarakat.
Sabage langkah awal, Wali Kota Bodewin ajak samua pagawe Pemkot Ambon par tanang paleng sadiki satu pohong gadihu alias puring di dong pung tampa karja masing-masing. Gadihu dapa bilang cocok par biking manis Ambon.
Tanaman gadihu paleng top sabage tanaman hias perdu deng daong warna cerah dan bentuk rupa-rupa. Akang cocok par di taman kota, ruang publik, mopun parkantoran pemerintahan. Selaeng biking bagus kota, tanaman ini pas deng kondisi Ambon.
“Beta minta satiap dinas deng pagawai tanang minimal satu pohong gadihu. Kalo bisa lebe banya. Katong tanang tanaman yang cocok deng Ambon par kota ini lebe ijo deng indah,” tegas Bodewin.
Pemkot Ambon sandiri su pasang target mo tanang 5.000 pohong dalang babarapa taong ka muka, tarmasuk pohon produktif yang bisa kase manfaat ekonomi par masyarakat. Program ini mo libatkan dinas takait, kacamatan, desa atau negeri, deng komunitas masyarakat par bajalan barkalanjutan.
Rencana garakan kabarsihan deng panghijauan ini akang manjadi bageang dar dukungan Pemerintah Kota Ambon tarhadap barbage program strategis nasional di bidang lingkungan hidup deng pambangunan masyarakat.
Wali Kota harap gerakan ini bisa jadi budaya baru par warga kota, sahingga kabarsihan dan panghijauan seng cuma jadi tanggung jawab pemerentah, mar juga samua masyarakat.
“Kabarsihan deng panghijauan bukang cuma program pemerentah, malaengkang tanggong jawab katong barsama. Kalo kota barsih deng ijo, masyarakat sehat dan ekonomi juga tumbuh,” ujar Bodewin.
Arahan ini jadi langkah awal konsolidasi internal Pemkot Ambon sabalong palaksanaan garakan kabarsihan deng panghijauan secara luas, deng tujuan biking lingkungan kota yang sehat, indah, deng nyaman par samua masyarakat. (Leo)
