AmbonVibes.com — Polisi lapas gas aer mata par kas bubar massa. Soalnya, masih poka-poka lai, kaributan pica di kawasan Urimessing, parsis di muka Karaoke Blitz, Kota Ambon, Minggu (15/2/2026).
Insiden ini sampat biking warga sakitar situ jadi panik. Aktivitas masyarakat di sakitar Hotel Amaris jadi taganggu sampe jam 07.00 WIT.
Keributan mulai pica sakitar jam 05.30 WIT manakala sakalompok pemuda bagara mo serang pamukiman warga. Aparat kepolisian yang ada di lokasi langsung ambe tindakan tegas. Polisi lapas gas air mata par kas ure konsentrasi massa.
Katagangan barlangsung cukup lama sampe akhirnya massa dapa pukol mundur. Setelah situasi mulai lebe bae, polisi langsung dialog deng sajumlah pemuda par stop biking aksi.
Kapolresta Ambon Yoga Putra Prima Setya deng jajaran ada di lokasi par biking bae situasi. Aparat mambantu kas turung emosi warga.
Aksi pambubaran massa pak gas aer mata biking massa bubar. Situasi palang-palang mulai kondusif.
Bardasar rekaman video amatir yang baradar, dapa lia sajumlah pemuda bawa besi dan bongkar pagar pambatas sabalong maso serang ka arah pamukiman. Dong juga lempari rumah warga pake batu maski seng dapa lia warga di jalang utama..
Warga mangaku kalompok yang biking kaco-kaco ini dalang kaadaan mabo. Dong baru kaluar dari tampa hiburan malam.
“Dong ini dari Karaoke Blitz. Dong paleng banya,” ungkap salah satu warga di lokasi.
Aksi serang ini biking warga di lorong balakang Hotel Amaris seng tarima. Dong kaluar par cari sapa yang lempar dong pung rumah.
Salaeng pambubaran paksa, aparat juga pake dialog deng pemuda di tampa kajadiang par cegah eskalasi konflik. Kapolsek Nusaniwe Johan W.M. Anakotta ada di lapangan, iko pimpin upaya mediasi deng pangamanan.
Sampe jam 07.30 WIT, situasi di kawasan Urimessing su bale kondusif. Massa mulai bubar. Arus lalu lintas normal kumbali.
Polisi masih cari tau panyebab awal kaributan deng identifikasi palaku panyarangan yang picu katagangan. Warga juga minta aparat tindak tegas para palaku par cegah kajadian serupa, jang sampe taulang eso-eso. (red/kbrn)
