AmbonVibes.com – Kejaksaan Tinggi (Kejati) Maluku su loko sapuluh biji ruku, tarsangka tinggalong. Dong samua satu geng, tarika dalang parkara dugaan korupsi kepeng Kredit Usaha Rakyat (KUR) di Bank BRI Unit Tiakur, Kabupaten Maluku Barat Daya (MBD).
Sapuluh tarsangka dapa loko pas abis jaksa lia hasil audit Badan Pemeriksa Keuangan (BPK) dapa tau kepeng nagara takor sampe Rp2,8 miliar. Tim Panyidik Kejaksaan Negeri MBD loko dong, Senen (9/2/2026). Dong samua kamuka dapa pareksa dar jam 13.00 WIT sampe jam 21.00 WIT.
Dar sapuluh tarsangka, ada dalapang laklaki lalu dua laeng parangpuang. Dua orang memang pagawe Bank BRI, sadangkan dalapang orang dar luar bank mar jaksa duga dong itu parantara alias calo.
“Dua pagawe BRI yang jadi tarsangka itu KB sabage Kapala Unit BRI Tiakur dan AP yang jabat mantri. Sadangkan dalapang tarsangka laeng inisial AS, DU, LB, MS, RR, RS, NTA, deng YA maeng rol sabage calo, dong bantu tindak pidana ini bisa jadi,” ujar Kapala Seksi Penyidikan Kejati Maluku Azer J. Orno par wartawan di Ambon, Salasa (10/2/2026).
Manurut Azer, biji-biji ruku ini pake modus biking rekening kredit KUR fiktif, pake data masyarakat sondor parsatujuan sah. Dong kumpol warga pung Kartu Tanda Penduduk (KTP) lalu biking jadi calon debitur sondor warga yang pung KTP tau akang.
“Maski minta kredit pake data masyarakat yang sabanarnya, dana pinjaman dar APBN malalui BRI Unit Tiakur seng parnah sampe ka tangang dong yang pung nama ada dalang aplikasi. Tarsangka dong pake samua kepeng par dong pung pribadi,” ungkap Azer.
Hasil Audit BPK, Desember 2025, total karugian negara Rp2,8 miliar. Angka ini marupakan nilai kredit yang su caer mar seng pung dasar paminjaman yang sah deng sang parnah ada pambayaran.
Dalang proses hukum, samua tarsangka dapa jareng deng pasal pidana yang barkaitang deng tindak pidana korupsi. Dong dapa sangka bardasar katantuan parundang-undangan takait pambarantasan korupsi deng pasal-pasal laeng yang relevan.
Par kapantingan panyidikan, dalapang tarsangka laklaki dapa tutu di rumah tahanan nagara di Tiakur, sadangkan dua tersangka parangpuang dapa tutu di lembaga pemasyarakatan khusus parangpuang.
“Panampatan itu par pastikan proses hukum bajalang deng bae serta kase parlindungan yang sesuai par samua tarsangka,” jelas Azer.
Dia tegaskan, panyidikan bajalang tarus par mo ungkap kamungkinan pihak laeng iko tamaso dalang parkara ini. Saleng itu jaksa mo iko, kepeng mangalir ka mana par bisa kas bale kepeng nagara.
“Katong komitmen tindak tegas sagala bantuk tindak pidana korupsi, tarutama yang manyangkut kepeng par kasajahteraan rakyat macang KUR. Seng ada ruang par sapa pun yang coba-coba biking rugi nagara dan masyarakat,” tegas Azer. (red)
