AmbonVibes.com – Warga Kobisadar Kecamatan Seram Utara Timur Kobi, Kabupaten Maluku Tengah (Malteng) ada dapa masalah sarius takait produk Kredit Cepat (Kece) dar Bank Rakyat Indonesia (BRI). Sajumlah warga mangaku dong pung tacatat sabage panarima kredit maski seng parnah pinjam kepeng di bank itu. Bahkan bank tarek dong pung kepeng sampe saldo jadi nol Rupiah.
Parkara ini biking warga hati ancor, kepeng seng aman di BRI. Samua ini tagal dong dapa tau ada pinjaman atas nama dong, sondor dong tau sabalong itu, juga sondor parsatujuan resmi.
Salah satu korban itu lansia umor sakitar 80 taong. Paitua tacatat tarima kredit Rp10 juta. Dia pung kaluarga bilang, lansia itu ada samantara saki kronis deng cuma tidor-tidor di tampa tidor jadi seng mungkin urus kredit sacara langsung.
Seng cuma lansia itu. Sorang mahasiswa asal Kobi yang ada studi di Yogyakarta juga dapa dia pung nama tadaftar sabage panarima Kredit Kece. Dia mangaku seng parnah ajukan pinjaman dan baru tau dia pung nama sabage debitur. Dia dapa informasi dar kaluarga di Kobisadar.
Temuan itu biking warga hawatir deng dong pung kepeng-kepeng. Warga Kobisadar curiga, ada orang dalang di BRI yang salah pake dong pung kadudukan par biking galap dong pung kepeng-kepeng.
Anggota Komisi III DPRD Provinsi Maluku Rostina kase dukungan par warga Kobisadar. Dia minta dong samua tetap tanang dan kase kasampatan par BRI biking audir internal par bongkar akang pung akar parsoalan.
“Katong harap BRI pegang parkara ini deng bae dan seng anggap enteng masyarakat pung susah. Satiap pihak yang rasa rugi, dong pung hak dapa klarifikasi deng kapastian hukom,” tegas Rostina waktu dapa wawancara dar Ambon, Senin (9/2/2026).
Rostina juga carita pangalaman pribadi yang parnah dia pung kaluarga dapa akang takait proses kredit di BRI. Dia bilang, dia pung ade parnah minta kredit partama Rp25 juta deng jaminan oto pung BPKB. Rostina jadi panjamin. Mar, waktu dia pung ade mo minta kredit kadua Rp50 juta, proses itu jadi sondor dia pung ade tau, sondor tanda tangang resmi.
“Waktu kredit kadua macet, beta mo ambe BPKB oti mar dapa tola, bahkan dapa ancam mo sita. Mar waktu beta bilang siap kase oto, bank justru seng biking apa-apa. Ini tantu ada kaliru dalang manajemen deng kontrol internal BRI,” ungkap Rostina.
Rostina tekankan, penanganan kasus ini penting par transparan. Dia minta Pemerentah Negeri Kobi deng masyarakat par parcaya proses panyalasaian ka Komisi III DPRD Provinsi Maluku.
Dia tegaskan, nanti mo kawal parkara ini sampe klar dan pastikan seng ada praktik kolusi antara pagawe bank dan pihak luar, eso-eso.
“Setelah hasil audit resmi kaluar, masyarakat yang rasa rugi bisa hubungi Komisi III DPRD Provinsi Maluku par dapa bantuan hukum deng pandampingan. Katong pastikan satiap palanggaran mo dapa konsekuensi yang sasuai,” tegas Rostina.
Rostina harap BRI lakas evaluasi manyaluruh tarhadap sistem deng manajemen operasional, par kajadiang sarupa seng taulang. Juga kaparcayaan masyarakat par bank tetap tajaga. (Leo)
