AmbonVibes.com – Karja basar par biking bae rumah warga di Kawasan Hunuth tagal dapa bakar dar sakelompok orang, akang pung hasil mulai kantara. Pemerentah Kota Ambon malalui Dinas Perumahan Rakyat dan Kawasan Permukiman (Perkim) su kase pasti, samua rumah deng kategori rusak barat sakarang su abis karja lah su siap par tinggal maso.
Kapala Dinas Perkim Kota Ambon Ivonny Latuputty ungkapkan, fokus utama pemerentah itu lakas kas bale warga ke tampa tinggal yang layak. Dar pandataan Januari 2026, tacatat ada 15 rumah rusak barat, 5 unit di antaranya musti bangong baru dar nol tagal angos tabakar.
“Par kategori rusak barat, katong pastikan samua su kalar 100 persen. Bahkan Bapak Gubernur Maluku su mangente langsung akang pung hasil,” tegas Ivonny, di Balai Kota Ambon, Senen (2/2/2026).
Pananganan rumah warga Hunuth jadi potret nyata solidaritas lintas sektor. Total anggaran yang dapa kalola mancape Rp2,2 miliar, yang marupakan hasil “patungan” strategis: Pemprov Maluku: Rp1 Miliar, Pemkot Ambon (Dana BTT): Rp600 Juta deng donasi sabasar Rp530 Juta dar himpunan warga Ambon sampe Jakarta.
“Pak Wali Kota su komunikasi langsung deng banya pihak sampe bantuan ini takumpul. Ini bentuk solidaritas masyarakat yang luar biasa par katong pung sudara-sudara di Hunuth,” ungkap Ivonny.
Salaeng kategori barat, ada 27 rumah yang rusak ringan macang kaca pecah ato pintu tabakar. Saat ini, 11 rumah su kalar, sambilang dalang proses pangarjaan, samantara akang pung sisa masih dalam tahap koordinasi tagal pamilik rumah balong kumbali ato pihak laeng ada tinggal akang.
Ivonny tegaskan, warga yang su biking bae rumah secara mandiri pake kepeng pribadi—terutama waktu maso har Kajadiang lalu—tetap mo dapa kase panggantian dar pemerentah.
“Kalo pintu rusak su ganti sandiri oleh warga, tetap katong ganti iko nilai perhitungan pintu itu. Katong tetap komitmen di data karusakan awal,” jelas Ivonny.
Tagal kepeng yang ada ini juga donasi publik, Ivonny pastikan satiap rupiah dapa kalola secara hati-hati, transparan, dan akuntabel. Hal ini panting tagal saluruh panggunaan anggaran akang malewati proses audit oleh Badan Pemeriksa Keuangan (BPK).
“Ini kepeng publik dan donasi masyarakat, jadi seng bisa pake sabarang dapa. Pangarjaan ini akang bartahap iko kepeng, mar komitmen katong tetap: Biking abis iko janji Bapak Wali Kota,” pungkas Ivonny. (Leo)
