AmbonVibes.com — Kejaksaan Tinggi (Kejati) Maluku su resmi kas barenti urus parkara dugaan panyalahgunaan kepeng hibah Kwartir Daerah (Kwarda) Pramuka Provinsi Maluku Taong Anggaran 2022. Jaksa ambe kaputusan itu tagal samua potensi karugian kauangan daerah ratusan juta rupiah su stor bale ka kas daerah.
Maski ada indikasi kuat panyimpangan deng potensi karugian kepeng nagara, mar tagal tim jaksa dapa tau Bunda Widya Murad Ismail dkk di Kwarda Pramuka Maluku su stor bale kepeng ka kas daerah, maka jaksa dong langsung tutu parkara, jadi polemik parkara kepeng Pramuka, akang su ‘teletai’ di Kejati Maluku.
Asisten Intelijen (Asintel) Kejati Maluku Diky Oktavia bilang, parkara kepeng Pramuka ini marupakan tunggakan parkara taong 2023, yang tim penyelidik lanjut akang par kase kapastian hukum skaligus redam polemik di tengah masyarakat.
“Perkara ini katong tindaklanjuti sabage tunggakan taong 2022. Maka katong tentukan sikap par seng jadi polemik di masyarakat,” ujar Diky par wartawan di Ambon, Jumat (30/1/2026).
Dalang proses panyelidikan, tim Kejati Maluku biking klarifikasi ka sajumlah pihak yang talibat langsung sabage palaksana kagiatan panggunaan dana hibah Kwarda Pramuka Provinsi Maluku taong 2022. Dar klarifikasi itu, panyelidik dapa ada data deng katarangang yang mangarah par dugaan panyimpangan pangalolaan dana hibah.
“Dar hasil klarifikasi, katong dapa data deng keterangan dar para pihak yang marupakan palaksana kagiatang. Dar situ katong dapa dugaan panyimpangan dalang pengelolaan dana hibah itu,” jelas Diky.
Hasil panyelidikan lalu ungkap ada potensi karugian keuangan daerah Rp384.444.660. Temuan itu dapa kas banding deng hasil audit investigatif Inspektorat Provinsi Maluku sabagemana ada dalanng Laporan Hasil Pemeriksaan (LHP).
“Katong komparasi deng hasil audit investigasi Inspektorat. Dugaan itu benar dan su audit, jadi ada potensi kerugian daerah sebesar Rp384.444.660,” ungkapnya.
Diky bilang, dar hasil audit Inspektorat Provinsi Maluku, dana hibah Kwarda Pramuka yang dapa salur malalui Dinas Pemuda Olahraga Provinsi Maluku su tindaklanjut dengan pangambalian ka kas daerah.
“Bardasarkan hasil temuan Inspektorat Provinsi Maluku, Kwarda Pramuka su tindak lanjut deng setor kumbali kepeng Rp384.444.660 ke kas daerah tanggal 28 November 2023,” tegas Diky.
Deng bagitu, samua potensi karugian keuangan daerah, hasil ekspose perkara barsama tim panyelidik Kejati Maluku simpulkan, penanganan perkara dugaan panyalahgunaan dana hibah Kwarda Pramuka Provinsi Maluku Taong Anggaran 2022 dapa kas barenti.
“Kasimpulan hasil ekspose, parkara ini katong kase brenti. Mar kalo eso-eso ada bukti baru, tantu panyalidikan katong buka kumbali,” tandas Diky.
Diky tegaskan, samua proses pananganan parkara bajalang objektif, transparan, deng profesional, serta bardasar data yang bisa dapa uji dan bisa par pertanggung jawab akang.
“Ini bukang parkara yang sulit. Data dapa kas cocok dan fakta karugian daerah su kas bale. Ini katong sampaikan secara resmi par masyarakat,” pungkas Diky. (red)
