AmbonVibes.com — Juru Bicara (Jubir) Pamerentah Kota (Pemkot) Ambon Ronald Lekransy kase lurus opini stenga-stenga miring di tengah masyarakat saolah-olah. langkah hukum pamerentah itu tagal sikap anti-kritik.
Manurut Ronald, laporan ka polisi takait flayer yang ada tulis seruan aksi “tangkap dan penjarakan Wali Kota Ambon” bukang par tutu prop kritik, malaengkang bageang dar proses normatif dalang sistem demokrasi yang sehat.
Ronald ure akang, proses hukum yang Pemkot Ambon ambe musti samua lia akang sabage hubungan antara demokrasi, kabebasan barpendapat, deng supremasi hukum. Manurut dia, kabebasan barekspresi dalang negara demokrasi seng pung arti bebas sondor ada batas.
“Proses hukum ini panting par biking lurus pamahaman bahwa kabebasan barpandapat seng bisa dapa lapas dar tanggung jawab hukom. Ini bukang par suru tutu mulu malaengkang mekanisme demokrasi,” ujar Ronald di Ambon, Kamis (28/1/25).
Dia bilang, laporan hukum itu justru jadi sarana par uji dan cari sampe dapa kabanaran atas satiap tindakan di ruang publik, karena hukum barlaku adil par samua pihak, bae masyarakat mopun pemerentah.
Ronald tegaskan, Pemkot Ambon paleng hormat kritik deng kabebasan barpandapat. Mar, manakala informasi yang tabage su lewat sipat dan lia-lia akang ada carita kewel, stori binci-binci, ato cabar-cabar yang ancam katartiban deng kaamanan publik, maka langkah hukum itu satu niscaya.
“Pemerentah paleng hargai kabebasan barpandapat. Mar kalo su pung potensi bage hoaks, ujaran kabencian, deng provokasi yang biking rusak katertiban deng erta citra pemerentah, maka laporan polisi itu langkah demokratis,” tegasnya.
Manurut Ronald, langkah hukum juga pung tujuan lindungi masyarakat par seng jadi korban tindakan sawenang-wenang dalang hal kritik, sakaligus lindungi martabat deng fungsi negara dar fitnah yang bisa ganggu stabilitas pamerentahan.
Lebe jao Ronald tekankan, Pemkot Ambon paham deng bae kabebasan barpandapat sabage alat kontrol sosial par pemerentah tatap bajalang di jalur yang banar, seng jadi tirani. Mar dia kas inga, prinsip utama demokrasi itu kasetaraan di muka hukum. Bae masyarakat bae pemerentah pung hak deng kawajiban yang sama.
“Pemerentah apresiasi deng danke banya par samua kritik deng masukan dar masyarakat. Ka depan, katong harap masyarakat tetap kritis, mar musti etis deng demokratis, par Kota Ambon lebe pung kualitas,” pungkas Ronald. (Ce)
