AmbonVibes.com — Wali Kota Ambon Bodewin Wattimena bilang deng tegas, kabebasan barpandapat seng bisa mangarti akang sabage ruang par biking narasi satu pihak yang kase sudut orang ato jabatan tartantu, lebe-lebe par apa-apa yang balong pasti akang pung salah-banar sacara hukum.
Wali Kota Bodewin kas kaluar parnyataan itu, Rabu (28/1/2026), par tanggapi narasi yang baredar deng selebaran aksi yang su lewat batas kritik yang sehat.
“Kabebasan barpendapat seng ajar katong par enak-enak saja bangong narasi manganai sasaorang ato dia pung jabatan lebe-lebe par apa-apa yang balong pasti akang pung banar,” ujar Bodewin.
Manurut Bodewin, istilah ato tuntutan yang su macang kase hukuman, musti cuma par pihak yang su tabukti barsalah bardasarkan putusan pangadilan yang pung kakuatan hukum tetap.
Dia tekankan, penting par junjung asas praduga tak barsalah dalang manyikapi parsoalan hukum.
“Kalo masih pake kata ‘diduga’, maka asas praduga tak barsalah musti taruh di muka. Samua warga nagara pung kadudukan yang sama di muka hukum,” tegasnya.
Bodewin juga jelaskan parbedaan mandasar antara gratifikasi deng retribusi, yang kerap orang salah paham dalang ruang publik.
“Gratifikasi pung kaitan deng pamberian uang ato barang par panyelenggara nagara sacara pribadi karena jabatan yang dia emban. Samantara retribusi itu pambayaran atas jasa atau izin kapada pamerentah sabage lembaga, bukang par pribadi,” jelasnya.
Lebe lanjut, Wali Kota Ambon biking inga masyarakat lebe ati-ati par biking narasi manyangkut satu isu, lebe khusus takait deng nama bae, kanyamanan pribadi, deng kaluarga sasaorang.
Manurut Dia, manghakimi pajabat publik seng serta-merta biking ilang hak-hak pribadi sabage warga nagara.
“Kritik boleh sampekan, mar musti santun, pung etika, dan pung basis fakta. Manghakimi sasaorang dalang jabatan seng biking ilang unsur pribadi orang itu,” ujarnya.
Bodewin juga singgung pihak-pihak yang bangun narasi karas, mar justru pung potensi ada kapantingan atau mandapatkan manfaat dari proses yang dia parsoalkan.
“Kalo sasaorang tarima sasuatu dar pangelola dan yang barsangkutan itu panyalenggara nagara, maka itu justru lebe tepat maso kategori gratifikasi,” katanya.
Menutup parnyataan, Bodewin tegaskan langkah hukum yang Pamerentah Kota Ambon ambe bukang bantuk sikap anti kritik, malaengkang upaya par jaga martabat pajabat publik dan pribadi di ruang publik.
“Kalo parsoalan ini pung ujung di proses hukum, itu bukang tagal Wali Kota anti kritik. Mar karena narasi yang dong bangong bukang kritik lai mar su mangarah par upaya pambunuhan karakter, bae sabage pejabat publik mopun sabage pribadi,” tegasnya.
Dia harap samua pihak bisa baku hargai hak deng kawajiban masing-masing dalang manyampekan pandapat.
“Hak katong par barbuat dan barpendapat musti tetap hormati hak orang laeng. Itulah esensi demokrasi yang sehat,” pungkas Bodewin. (Piere)
