AmbonVibes.com — Oras-oras pemeretah pusat maeng kabijakan efisiensi dan pangkas transfer kepeng ka daerah mudel bagini, Katua DPRD Provinsi Maluku Benhur Watubun buang bola ka Pemerentah provinsi (Pemprov) Maluku par barani ambe langkah strategis kase ramping struktur Organisasi Perangkat Daerah (OPD).
Benhur punya usul konkrit, par Pemprov Maluku iko atorang parundang-undangan yang kase batas jumlah OPD maksimal 32 unit. Jadi parampingan musti biking akang deng taukur, deng basis kabutuhan riil daerah, pung orientasi ka paningkatan kinerja deng palayanan publik.
“Akang pung ideal di kisaran 32 OPD. Ini panting par tata kelola pemerintahan daerah bisa bajalang lebe efektif deng efisien,” kata Benhur par wartawan di Gedung DPRD Maluku, Senin (19/1/2026).
Benhur bilang, daerah ini musti lebe optimal deng biking efisien tubuh OPD. Jang sampe sama deng pemerentah pusat, menteri-menteri paleng banya mar balong tantu karja bae.
Dia tegaskan, parampingan OPD musti jadi momentum par bangong birokrasi yang lebe ramping, responsif, deng mampu jawab tantangan pambangunan daerah di tengah katarbatasan fiskal.
Langkah parampingan dinilai penting par OPD bisa kase nae kinerja, kase maksimal Pendapatan Asli Daerah (PAD), deng kase palayanan publik yang lebih optimal.
Benhur tegaskan, perampingan OPD bukang semata soal kas kurang jumlah perangkat daerah, malaengkang bangong sistem karja pemerentahan yang lebe efisien, efektif, deng fungsional.
“Parampingan OPD bukang sakadar pangurangan jumlah parangkat daerah, malaengkang upaya bangong sistem karja yang efisien deng prinsip miskin struktur mar kaya fungsi’,” kata Benhur
Manurut Dia, efektivitas pemerentahan seng tagantong di struktur birokrasi pung banya, malalengkang akang pung fungsi-fungsi palayanan dan pangalolaan pambangunan bajalang optimal ka seng.
“Jadi maski miskin struktur, tapi kaya fungsi, macang dolo-dolo,” ujarnya.
Benhur kase contoh, sajumlah daerah deng pandapatan tinggi macang Provinsi Bali deng Sulawesi Selatan, yang mampu ka bajalang roda pemerentahan sacara efektif maski jumlah OPD seng talalu banya.
“Daerah-daerah yang pung pandapatan tinggi saja, dong pung OPD seng talalu banya,” ungkapnya.
Dia manilai, talalu banya OPD justru akang pung potensi kas besar beban balanja birokrasi sondor jaminan paningkatan kinerja deng kualitas palayanan.
Benhur harap Pemprov Maluku di bawah kapamimpinan Gubernur Hendrik Lewerissa pung kajian yang matang takait panataan organisasi parangkat daerah. (Keket)
