AmbonVibes.com — Wali Kota Ambon Bodewin Wattimena kase tau, sapanjang taong 2025, turis lokal, demestik, deng mancanagara yang datang ka Ambon, lebe hari lebe banya. Akang pung tren nae.
Manurut Bodewin, paningkatan ini seng lapas dar samaking kuat daya tarek budaya Ambon di mata publik nasional. Salah satunya malalui panatapan Papalele sabage Warisan Budaya Tak Benda Indonesia.
“Paningkatan itu, mungkin saja takait era deng panetapan Papalele sabage Warisan Budaya Tak Benda Indonesia, yang su manarik perhatian nasional,” kata Wattimena, saat dapa kontak dari Ambon, Kamis (15/1/2026).
Manurut Bodewin, aktivitas Mama-mama Papalele bukang cuma jadi simbol ekonomi rakyat kacil, mar juga representasi nilai budaya, katangguhan, deng kaarifan lokal masyarakat Ambon.
Dia manyebut, pangakuan nasional itu kase warna baru par promosi pariwisata kota, sakaligus biking kaya pangalaman wisatawan yang datang.
“Katong lia antusiasme tinggi dar barbage kalangan par mangente Ambon, bae par menikmati keindahan alam mopun par palajari budaya yang su dapa pangakuan nasional,” sebutnya.
Bodewin tambahkan, wisata berbasis budaya oras ini jadi salah satu sektor yang orang suka, seiring kasadaran wisatawan tarhadap nilai-nilai lokal dan autentik su tamba lebe bae.
Tagal itu, Bodewin bilang, Pemerintah Kota Ambon pung komitmen par tarus kembangkan infrastruktur pandukung pariwisata, sakaligus manjaga kelestarian budaya lokal sabage bagian bageang dar identitas kota.
“Katong akang tarus kembangkan infrastruktur pariwisata deng lestarikan budaya lokal, par bisa dukung partumbuhan sektor ini sacara barkalanjutan,” tegasnya.
Walikota Bodewin harap paskali, deng biking kuat sektor pariwisata, seng cuma akang bawa dampak par jumlah kunjungan yang tarus nae, mar juga buka peluang ekonomi par masyarakat, khususnya palaku usaha kecil dan komunitas budaya. (Piere)
