AmbonVibes.com — Pabrik roti seng parnah biking roti narkoba. Mama-mama di rumah jua seng parnah bakar roti campor narkoba. Maar pas har Minggu (4/1/2026), panas-panas tambaru, laklaki satu antar roti ka Lapas Kelas IIA Ambon. Dalam bungkos roti itu, dia sisip narkoba jenis sabu-sabu.
Laklaki pangantar roti itu pung nama AP. Dia datang antar roti, titip par patugas Lapas Ambon. Di bilang roti par dia pung karabat yang ada dalang binaan Lapas. Abis itu dia pigi capat-capat. Memang, kalo titip makanang ato barang ka patugas, itu su biasa, seng apa-apa. Nanti patugas yang antar ke dalang.
Sabalong patugas antar roti ka dalang, su jadi standar karja, dong musti pareksa satu-satu deng teliti paskali. Makanang macang nasi padang jua, tetap dapa buka, nasi dapa pareksa, jang sampe ada apa-apa.
Nah, waktu pareksa-pareksa, petugas dapa bungkusan yang lia akang laeng-laeng. Petugas jadi curiga. Akhirnya, petugas lapas buka akang, lalu dapa tau memang ada narkoba jenis sabu-sabu.
Maski orang yang bawa akang roti narkoba itu su capat-capat pigi, patugas lapas langsung lapor akang ka Polresta Ambon-Lease. Polisi langsung biking tim investigasi gabungan antara Polresta Ambon
Penanganan kasus ini akang deng jalang investigasi gabungan antara Polresta Ambon deng Direktorat Reserse Narkoba Polda Maluku. Bagitulah polisi biking langkah sinergi par barantas paradaran narkoba, lebe khusus dalang Lapas.
Direktur Reserse Narkoba Polda Maluku Kombes Pol Indra Gunawan mangaku, memang batul polisi su loko pambawa roti narkoba itu.
“Banar, ini hasil investigasi gabungan Polda Maluku dan Polresta Ambon-Lease. Katong su tangka tersangka yang antar barang itu ,” kata Indra Gunawan, Rabu (14/1/2026).
Tersangka AP, lahir 1993. Dia pung alamat di Kecamatan Sirimau, Kota Ambon. Polisi loko dia masih deka-deka saja, di wilayah hukum Polresta Ambon-Lease.
“Sakarang, proses panyidikan deng pangambangan parkara masih tarus bajalang,” tambah Indra Gunawan.
Parkara roti narkoba ini jadi bukti, tarnyata sampe oras ini, Lapas masih jadi sasaran paradaran narkoba, deng sagala macang modus. Polisi tarus pegang komitmen biking ketat pangawasan deng manindak tegas jaringan narkoba sampe ka akang pung akar-akar. (Piere)
