AmbonVibes.com — Kajaksaan Tinggi Maluku paleng manyala. Parkara yang tagantong lama di laci jaksa, sakarang mulai dapa buka satu-satu. Salah satu parkara yang ada samantara bajalang itu dugaan korupsi kepeng pananganan Covid-19 di Pemerentah Provinsi Maluku Taong 2020–2021
Panyalidikan parkara dugaan korupsi anggaran penanganan Covid-19 di Pemerentah Provinsi Maluku taong 2020–2021 su mulai deng pangge pihak yang tau batul alur pamakeang kepeng, par kase keterangan ka jaksa.
Informasi yang dapa dari internal Kejati Maluku manyabutkan, pamariksaan saksi su bajalang dar Senen (12/1/2026) deng Salasa (13/1/2026).
“Par parkara Covid, pamariksaan saksi su mulai barlangsung. Pamariksaan dar kalamareng. Ada satu-dua dapa pariksa, har ini jua ada lai,” ungkap sumber di Kejati, Salasa (13/1/2026).
Pamariksaan saksi di tahap panyalidikan ini jadi sinyal karas, Kejati Maluku yang sakarang dalang komando Rudy Irmawan su mulai unju sikap sarius par bongkar parkara-parkara korupsi yang salama ini ada kasan, akang tinggalang.
Parkara dugaan korupsi anggaran Covid-19 ini sandiri, dari banyak sumber bilang, nama Sekretaris Daerah (Sekda) Maluku Sadali Ie juga ada tabawa-bawa.
Kasi Operasi Kejati Maluku Ahmad Bhirawa bilang, banar adan pamariksaan saksi dalang perkara covid.
“Iya benar. Ada. Iya (pemeriksaan) dar kalamareng,” ujar Ahmad singkat saat wartawan konfirmasi di Pengadilan Negeri Ambon.
Nada-nada yang sama juga dapa kastau dar Asisten Intelijen Kejati Maluku Diky Oktavia. Dia tegaskan, panyalidikan parkaran kepeng Covid-19 Pemprov Maluku su mulai bajalang setelah cukup lama tasimpang di meja tim penyelidik.
“Su jalang. Ada samantara baproses, masih panyalidikan jadi balong bisa dapa rilis ya, iko sa. Akang pung inti, samantara ada proses,” ungkap Diky singkat.
Sajumlah saksi yang su dapa pariksa dalang dua hari kelamareng antara laeng:
Ismail Usemahu, Kapala Dinas PUPR Provinsi Maluku; Muhammad Nasir Kilkoda, bakas Kapala Dinas Koperasi dan UKM tahun 2020; Elvis Pattiselanno, bakas Kepala Dinas Perindag Provinsi Maluku; Lutfi Rumbia, bakas Kepala BPKAD Provinsi Maluku; Anthon Lailossa, Kepala Bappeda Provinsi Maluku; deng sajumlah pejabat dar PPKAD Provinsi Maluku
Salaeng itu, panyidik juga pariksa: PPK taong 2020 deng Bendahara Pangaluaran taong 2020 Dinas PUPR; Bendahara Covid-19 di Dinas Kesehatan; PPK taong 2021 di Dinas Kesehatan; deng PPK taong 2020 Dinas Kehutanan Provinsi Maluku (pamariksaan lanjutan)
Samantara itu, Sekda Maluku Sadali Ie sampe oras balong dapa pariksa.
Sabagemana berita yang kamuka su kaluar di banya media, parkara dugaan korupsi kepeng Covid-19 Pemprov Maluku ini mancakup barbage item balanja darurat salama masa pandemi, yang sakarang su molai dapa sisir di panyidik Kejati Maluku. (red)
