AmbonVibes.com — Wakil Wali Kota Ambon Ely Toisutta turung langsung lia lokasi kabakarang hutan kawasan Camp Ema, Negeri Leahari, wilayah parbatasan antara Negeri Leahari dan Negeri Hukurila, Kecamatan Leitimur, Kota Ambon, Minggu (11/1/2026).
Wawali Ely turung tagal ada laporan masyarakat par Pemerintah Kota Ambon takait paristiwa kabakarang yang makang abis sabageang kawasan hutan dan lahan karing di tampa itu. Ely sampe di sana dapa batamang deng aparat pemerentah negeri deng pihak laeng par lia situasi lapangan pasca kabakarang.
Dalang katarangang wartawan, Ely bilang panyebab kabakarang balong bisa tau deng pasti. Dia sebut, maski ada info dar sajumlah pihak mar musti proses akang dolo.
“Kabakarang yang tarjadi akhir-akhir ini, seng bisa katong biking kesimpulan langsung ada unsur kasangajaan. Biarlah proses panyalidikan yang pastikan. Mar yang pasti, kejadiang macang bagini bukang yang partama malaengkang subulang-ulang sabang taong,” ujar Ely.
Dia tekankan, panting par samua pihak seng usah spekulasi, sakaligus kase ruang par aparat penegak hukum ungkap panyebab sabanarnya.
Ely tambahkan, maskipun kabakarang kali ini seng makang korban iwa, Pemerintah Kota Ambon tetap sarius urus dampak lingkungan yang muncol.
Salaeng itu potensi ancaman kasalamatan warga juga jadi parhatian utama. Manurut Ely, barbage masukan dar masyarakat, tarmasuk usulan pambangunan sarana pangamanan di kawasan rawan kebakaran, nanti mo bahas deng pemerintah negeri satempat.
“Samua saran dar masyarakat tantu Katong bicara deng pemerentah negeri. Kalo mungkin, Katong kolaborasi par biking aman wilayah rawan kabakarang ini,” jelasnya.
Wakil Wali Kota juga imbau masyarakat, khususnya yang tinggal di deka-deka kawasan hutan dan lahan karing, agar tarus waspada pas musim kamarau.
Dia harap masyarakat Iko maeng peran aktif jaga lingkungan dan ambe langkah antisipasi dini par cegah kabakarang yang biking rugi banya orang.
“Kasadaran barsama manjadi kunci. Katong samua pung tanggung jawab jaga alam par seng tarus jadi korban kalaleang,” pungkasnya. (Keket)
