AmbonVibes.com – Ohoi Kelanit, itu negeri di kaki bukit Masbait, Kei Kecil Maluku Tenggara. Negeri yang manis, orang-orang di sana suka dame deng tanang. Mar di tengah musim kemarau itu, Kamis, 2 Oktober 2025, Paman Rudi alias LL (48 taong) biking samua kage tarbae.
Hari-hari panas, Paman Rudi juga hati panas. Dia emosi paskali par ponakan parangpuang nama Kori alias KL. Ujung pangkal masalah cuma dong dua yang lebe tau. Mar sondor banya bicara, Paman Rudi ramas dia pung palungku basar. Sakali lot saja di Kori pung dalang muka, Kori langsung rubuh di atas jalang. Bukang cuma rubuh, mar juga smaput.
Samua kaluarga deng orang Evav takajo, tagal di tanat sus beb tanat fatnim itu, orang laklaki paleng hormat, paleng jaga, paleng bela dong pung sudara parangpuang. Mar Rudi laeng dari yang laeng.
Kaluarga Kori seng tarima bae. Tagal itu, dong langsung pi lapor kajadiang itu ka Polres Malra. Polisi sarius tarima laporan lalu langsung bagara. Dalang konferensi pers di Langgur, 12 November 2025, Kapolres Malra AKBP Rian Suhendi kase tau, polisi su loku Rudi, deng su jelas dia pung status sabage tarsangka.
Proses panyidikan di Polres Malra su kelar, lalu har Jumat (9/1/2026), Polres Malra ovor Rudi deng dia pung berkas dan barang bukti ka Kejaksaan Negeri Maluku Tenggara.
Dudu deng Kasat Reskrim AKP Barry Talabessy, Kapolres Rian Suhendi bilang palimpahan barkas parkara Rudi ka kajaksaan ini pas abis barkas parkara su langkap ato P-21.
“Polres Malra pastikan samua barkas perkara deng barang bukti su kase k Kejaksaan Negeri Malra,” kata Rian.
Rian kase tau, tarsangka Rudi dapa ika deng Pasal 466 ayat (1) Undang-Undang Nomor 1 Tahun 2023 tentang Kitab Undang-Undang Hukum Pidana (KUHP).
“Dar hasil panyidikan dan palimpahan berkas perkara tahap I ka Kejaksaan Negeri Malra, panyidik su penuhi samua patunjuk Jaksa Penuntut Umum. Barkas su langkap atau P-21,” katanya.
Kapolres Malra kase imbauan par masyarakat, jang pake cara kakarasang par biking abis masalah. Dia harap, parkara ini jadi palajaran par masyarakat lebe pilih jalang dialog dan cara-cara dame dalang manghadapi satiap masalah.
“Seng ada masalah yang biking deng kakerasan akan pung ujung dame. Katong minta samua pihak barani lapor tindakan kakarasan dan jang cuma jadi panonton,” tegasnya. (Vera Renyaan)
