AmbonVibes.com — Parkara dugaan tindak pidana korupsi kepeng pananganan pandemi covid-19 di Dinas Kesehatan Maluku Tenggara su dua tahun tadudu saja dalang laci meja jaksa. Mar, taong 2026 muda-muda ini, kabar bae datang dar Kajaksaan Tinggi (Kejati) Maluku. Korps Adhyaksa ini su buka kumbali lambar-lambar parkara pamakean kepeng yang tacurah waktu darurat kesehatan tempo hari.
Asisten Intelijen Kejati Maluku Diky Oktavia bilang, panyalidikan sakarang su buka kumbali. Dong su susun rancana karja lanjutan. Salah satu rancana itu, mo pangge samua yang ada kaitang par minta dong katarangang par kas jalas parkara ini.
“Tim segera mo pangge pihak-pihak takait par minta katarangang, biking jalas dugaan panyimpangan dalang pangalolaan kepeng covid-19,” kata Diky ka wartawan di Ambon, Kamis (8/1/2026).
Manurut Diky, proses panyalidikan seng cuma sabatas pamariksaan saksi, mar juga fokus di panalusuran aliran kepeng sacara manyaluruh. Tim jaksa nanti mo ure parkara ini dari tahap parancanaan, panganggaran, sampe palaksanaan kagiatang di lapangan.
Pihak-pihak yang nanti dapa pangge antara laeng unsur Organisasi Perangkat Daerah (OPD) yang talibat langsung, panyadia barang deng jasa, serta pihak laeng yang manurut jaksa, dong tau pamakeang kepeng covid-19 di Maluku Tenggara.
“Sapa sa yang ada pung hubungan deng kepeng covid-19 nanti katong pangge. Samua katarangang Katong parlu par biking tarang parkara ini,” tegasnya.
Diky bilang, Kejati Maluku su pung komitmen pegang parkara ini sacara profesional, objektif, deng transparan, sondor pandang latar balakang mopun jabatan pihak-pihak yang talibat.
Dia pastikan, kalo dalang proses panyalidikang ada dapa bukti permulaan yang cukup, maka parkara ini kas nae ke tahap pananganan hukum dalanjutnya iko katantuan parundang-undangan.
“Katong mo pastikan satiap rupiah kepeng nagara dapa pake sabagemana mestinya. Apabila katong dapa unsur pidana, tentu katong mo tindak lanjut akang iko katantuan hukum yang barlaku,” ujarnya.
Di akhir katarangang, Diky buju masyarakat Maluku par sabar deng dukung proses hukum yang ada bajalang. Deng bagitu, manurut dia, panyalidikan bisa bajalang sacara optimal.
“Pananganan parkara ini harap bisa Kase rasa kaadilan par masyarakat deng jadi pambalajaran panting dalang pangalolaan kauangan nagara, eao-eso,” papar Diky (red)
