AmbonVibes.com — Wali Kota Ambon Bodewin Wattimena managaskan komitmen Pemerentah Kota (Pemkot) Ambon par parang lawang praktik parkir liar yang su lebe banya dan mulai ganggu katartiban deng biking rusak wajah kota. Panagasan itu, wali kota sampekan waktu apel pagi jajaran Pemkot Ambon di Balai Kota Ambon, Senen (5/1/2026).
Manurut Bodewin, masalah parkir liar bukang sakadar masalah lalu lintas, mar ini manyangkut wibawa deng kredibilitas negara dalang biking tegak atorang di ruang publik.
“Institusi negara musti tampil kokoh deng hadir di lapangan. Seng boleh ada toleransi par parkir liar dan kalompok-kalompok yang sacara sapihak kuasai ruang publik,” tegasnya.
Wali Kota manilai, salama ini pananganan parkir liar cenderung barsifat samantara. Abis operasi panartiban, praktik sarupa muncul kumbali muncul karena seng iko deng pangawasan barkalanjutan.
“Katong seng boleh cuma tartib sasaat. Abis itu kas biar lalu muncol lagi. Kalo bagitu tarus, masalah seng akang parnah klar-klar,” ujarnya.
Dia tekankan parlu ada pola panartiban yang konsisten dan barkasinambungan par masalah parkir liar sang tarus taulang-ulang deng jadi panyake kronis kota.
Dalang arahan, Bodewin juga ungkapkan, Pemkot Ambon su koordinasi intensif deng Polresta Ambon-Lease par ambe langkah tegas oar parkir ilegal, tarutama di jalur-jalur utama deng stamplat.
“Parkir di badan jalang deng terminal musti kase stop. Itu parkir ilegal dan mo tindak iko atorang,” katanya.
Dia manilai, parkir sabarang seng cuma hambat mobilitas masyarakat, mar juga pung potensi biking bahaya kasalamatan pangguna jalang deng biking rusak citra Kota Ambon sabage ibu kota provinsi.
Salaeng parkir liar, Wali Kota iko soroti kabaradaan kalompok-kalompok masyarakat yang klaim hak eksklusif par ruang publik. Manurut Bodewin, seng ada satu pun kalompok yang barhak kuasai fasilitas umum di Kota Ambon.
“Ambon ini milik barsama. Samua warga pung hak yang sama par pake fasilitas publik, mar wajib tunduk iko atorang,” tegasnya.
Bodewin instruksikan saluruh parangkat daerah takait, mulai dar Dinas Perhubungan, Dinas Pekerjaan Umum, sampe aparat penegak hukum, par turung langsung ka lapangan sacara rutin dan seng tunggu instruksi khusus.
Bodewin harap, capean panataan kota sapanjang taong 2025 bisa jadi momentum par biking kuat katartiban di taong 2026 malalui kahadiran pemerentah yang nyata deng konsisten.
“Negara haros manang. Ambon musti jadi kota yang tertib, aman, dan nyaman par samua warga,” pungkasnya.
Sabage tindak lanjut, Dinas Perhubungan Kota Ambon deng Polresta Ambon su rencana operasi panartiban dalang waktu deka, deng fokus di kawasan-kawasan rawan parkir liar dan panguasaan ruang publik. (piere)
