AmbonVibes.com – Wakil Wali Kota Ambon Ely Toisutta turung langsung angkat sampah yang talaberang di sajumlah titik Tempat Pembuangan Sampah (TPS) di Kota Ambon, Jumat (2/1/2026).
Aksi Ely Toisuta itu tarakam dalang video pende yang dong kas kaluar di akun Facebook resmi Pemerentah Kota Ambon, “BetaAmbon”, jam 12.00 WIT. Dalang video itu, dapa lia Ely loku sampah yang taambor di luar bak TPS lalu kas maso akang kumbali ka tampa sampah.
Lokasi yang Wakil Wali Kota Ambon pigi itu antara laeng TPS Tanjakan 2000 deng TPS Tanjakan Kapok, Negeri Batumerah, Kecamatan Sirimau, Kota Ambon.
Manurut Ely, sampah di lokasi itu, kamuka su abis dapa angka dari patugas kabarsihan lalu su bawa pi buang ka Tempat Pembuangan Akhir (TPA). Mar waktu Ely turung lia siang-siang, masih dapa sampah baru yang orang buang di luar jam yang Pemkot su ator.
“Akang pung arti, masyarakat masih balong paham, jam buang sampah itu jam berapa,” kata Ely.
Ely buju warga Kota Ambon par buang sampah iko deng waktu yang Pemot Ambon su ator, yakni mulai jam 22.00 WIT sampe 05.00 WIT.
Dia bilang, patugas kabarsihan bakarja angka sampah, pagi hari. Tagal itu, kalo masih ada sampah talamberang sampe siang hari, kondisi itu akang ganggu kota pung barsih deng indah.
“Mari warga bantu Pemkot Ambon par katong biking barsih kota Ambon. Par di siang hari su seng ada sampah lae tagal su dapa angka dari saudara-saudara kita yang bartugas,” ujarnya.
Ely juga ajak masyarakat par kerja sama jaga kabarsihan kota deng membuang sampah di akang pung tampa iko waktu yang Pemkot su ator.
“Inga! Buang sampah jam 10 malang sampe jam 5 pagi. Kalo su pagi sampai siang, jang buang sampah lai par kota ini dapa lia barsih dan rapi,” tegasnya.
Pemkot Ambon harap kasadaran masyarakat tarus maningkat demi mewujudkan lingkungan kota yang bersih, sehat, deng nyaman par saluruh warga. (red)
