AmbonVibes.com – Ikatan Kaluarga Basar Teon Nila Serua (IKB-TNS) Kota Ambon biking ibadah syukur Har Kajadiang 2025, dalang sumangat hidop orang basudara, sabage wujud komitmen par rawat hidop orang basudara sondor ada pampele tagal beda status sosial.
Parayaan Har Kajadiang IKB-TNS ini jadi momen par refleksi manyangkut iman, solidaritas, deng kabarsamaan dalang dunya yang su lebe dalang pangaruh globalisasi ekonomi, sosial, deng spiritual.
Ketua BPD IKB-TNS Kota Ambon Dr Ronald Lekransy ST M.Si sampekan samua itu waktu kase sakapur sirih, ucap salamat datang par samua warga TNS di Ambon, yang iko parayaan di Gadong Gareja Hok Im Tong, Senen (29/12/2025).
Waktu kase sambutan, Lekransy biking inga warga TNS di Ambon manganai falsafah hidop “Ukmumory Tari Solilakta” yang marupakan ajarang Up A Memra ato ajarang leluhur yang musti tarus wariskan akang ka ana cucu. angkatan sakarang ini maupun angkatan eso-eso.
Manurut Lekransy, nilai “Ukmumory Tari Solilakta” managaskan makna hidop orang basudara paleng sejati yang seng lia latar balakang sosial, ekonomi, ato status apapun.
“Parayaan Har Kajadiang IKB-TNS Taong 2025 ini marupakan bantuk komitmen kaluarga-kaluarga par tarus rawat hidop orang basudara dalang ikatang kasih, sabage anugerah Tongala yang musti katong bilang syukur,” ujar Lekrasy.
Dia juga bilang, parayaan Har Kajadiang jadi ruang paranungan barsama par bisa dapa visi baru dalang biking kuat relasi internal kaluarga basar TNS, sakaligus biking loas relasi deng pemerentah deng lingkungan deka-deka sabage wujud iman yang hidop deng bawa dampak bae.
Lekransy tekankan, seng boleh maknai Kajadiang sabage tradisi saban taong ato ritual gareja yang biking ulang-ulang, malaengkang momentum spiritual par mangarti empati Tongala par manusia malalui Kajadiang Yesus Kristus.
“Malalui Kajadiang, katong dapa ajak par biking refleksi manganai Kasih Tongala yang hader dalang kasadarhanaan deng karandahan hati,” kata Lekransy.
Dia bilang, samangat Kajadiang musti dorong Kaluarga Basar TNS par tarus bangong relasi harmonis, pono empati, deng baku tongka dalang kahidopan barsama.
Lekransy ajak samua warga TNS lebe deka deng Tongala, lebe-lebe par tangada macang-macang parsoalan hidop yang pono tantangan global, yang pung dampak langsung dalang kahidopang masyarakat.
“Katong ada samantara dapa tantangan macang resesi ekonomi, panurunan Produk Regional Bruto, investasi loyo, inflasi, sampe lebe tamba banya orang yang seng ada hambak. Tagal itu, warga TNS musti balajar hidop hemat-hemat, efisiensi, deng hidop sederhana,” ujarnya.
Hidop sederhana itu, manurut Lekransy, bukang bararti hidop seng ada arti ato lia kacil di mata orang laeng, malaengkang justru manjadi jalang par dapa makna Kajadiang yang sejati, sabagemana Yesus yang jadi dalang kasadarhanaan palungan.
“Samoga sumangat Kajadiang ini tarus kas kuat katong sabage orang basudara,” pungkas Lekransy (Che)
