AmbonVibes.com — Kakacewaan tarhadap janji pemerintah seng biking warga patah samangat. Justru warga pung jiwa swadaya langsung muncol. Inilah yang jadi di Ohoi Rumadian, Kacamatan Manyeuw, Kabupaten Maluku Tenggara. Dong di sana tarpaksa biking jambatang darurat dar kayu deng papan secara mandiri. Samua ini tagal jambatang parmanen dar janji Pemerintah Provinsi Maluku su talalu lama sondor kabar.
Jambatang panghubung antarkecamatan itu kamuka ambruk tagal kalabihan kapasitas, 11 Maret 2025. Mar sampe tutu taong 2025 ini, janji parbaikan yang dar Gubernur Maluku balong pung wujud.
Salah satu warga Ohoi Rumadian Egidius Sadsuitubun kas kaluar rasa kacewa tagal respons pemerintah provinsi talalu lama. Dia bilang warga su mananti amper sapuluh bulang sondor ada kajalasang.
“Waktu jambatang ambruk kan Gubernur Maluku sandiri yang janji biking bae akang mar sampe oras seng biking,” ungkap Egidius, Selasa (30/12/2025).
Manurut Egidius, kondisi jambatang paleng bahaya par wargam tarutama anana deng parampuang yang saban hari lewat di atas jambatan rubu-rubu.
“Saban hari katong lia anana deng parampuang musti bataruh nyawa nae pinggir jambatang. Dari situlah empati warga mulai muncol,” ujarnya.
Egidius jelaskan, barbagai elemen masyarakat su ulang-ulang suarakan aspirasi, mulai dar tokoh pemuda, tokoh masyarakat sampe tokoh agama. Mar, seng ada respons dar Pemerintah Provinsi Maluku.
“Setelah mananti amper 10 bulang dan seng ada perhatian, warga akhirnya ambe inisiatif bangong jembatan darurat secara swadaya,” katanya.
Warga karja jambatang darurat itu deng samangat maren, gotong royong cara Evav salama tiga hari. Saat ini, jambatagn su bisa pake, maski cuma par kandaraan roda dua.
“Sejak awal bulang, su bisa pake jambatang. Tarif panyaberangan Rp5 ribu, mar seng paksa kalo warga seng pung kepeng,” jelasnya.
Saban hari, ratusan kandaraan roda dua lewat di aras jambatang darurat itu. Warga juga baku ganti jaga fasilitas panyaberangan par jaga kasalamatan barsama.
Maski demikian, Egidius tegaskan, jambatang darurat bukang solusi jangka panjang. Dia harap Pemerentah Provinsi Maluku segera realisasi jambatang parmanen sesuai janji gubernur.
“Pak Gubernur jang cuma bicara saja. Katanya mo lakas-lakas, segera, mar sampe har ini balong ada kajalasang. Harap bisa lebe capat,” pungkasnya. (Vera)
