AmbonVibes.com – Pemerentah Kota (Pemkot) Ambon sacara tabuka mengaku balong mampu kas abis samua kawajiban balanja daerah taong 2025. Samua itu tagal sampe tutu taong ini, seng dapa cape target panarimaan. Padahal, kamuka su hitong bisa dapa nanti akhir taong ini, mar tarnyata seng jadi.
Kapala Badan Pengelola Keuangan dan Aset Daerah (BPKAD) Kota Ambon Jopie Selano mangaku, tagal talat deng ada kakurangan realisasi pandapatan, akang pung dampak langsung par kamampuang kauangan daerah, lebe khusus dalang mamanuhi barbage kawajibang pambayaran Pemkot Ambon.
“Sajumlah panarimaan yang katong harap maso sampe tutu taong, tarnyata seng tarealisasi sasuai parancanaan. Akang pung pangaruh basar par kamampuan kauangan Pemkot dalang mamanuhi balanja,” Ujar Jopie par wartawan di Balai Kota Ambon, Senen (29/12/2025).
Jopie bilang, salah satu sumber panarimaan yang seng tarealisasi iko harapan adalah dana rembes gaji Pagawe Pemerentah Deng Parjanjian Karja (PPPK) sabasar Rp17,9 miliar. Dana itu, kamuka mo pake par ganti kas daerah yang su pake bayar gaji pegawe PPPK yang baru dapa angka.
Salaeng itu, panarimaan bage hasil pajak pusat, lebe khusus Pajak Penghasilan (PPH) Pasal 21, juga jao dar target. Dar estimasi Rp24 miliar, realisasi sampe tutu taong ini cuma 12,9 miliar, ato cuma saparo sa.
Tagal kepeng panarimaan tarbatas, Pemkot Ambon balong bisa biking sajumlah kawajiban balanja, mulai dar pambayaran ka pihak katiga, balanja rutin Organisasi Perangkat Daerah (OPD), pambayaran bahan bakar deng upah, sampe panyalasaian Dana Alokasi Umum (DAU) deng Dana Alokasi Khusus (DAK).
“Deng kondisi ini, beta sabage Kapala BPKAD Kota Ambon minta maaf par samua pimpinan OPD deng pihak katiga yang su bantu Pemkot, mar sampe oras Pemkot balong kas abis dong pung pambayaran,” ujar Jopie.
Maski balong dapa bayar, Jopie bilang samua itu seng angos malaengkang tacatat sabage utang Pemkot Ambon dan jadi tanggongjawab yang wajib biking abis akang taong anggaran barikot.
“Kawajiban par pihak katiga, bae kagiatan pambangunan maupun kabutuhan rutin yang su pung kontrak ato SPK, akang dapa pangakuan sabage utang, lalu akomodir maso di APBD taong barikot,” jelas Jopie.
Jopie parkirakan total kawajibang Pemkot Ambon ka pihak katiga, ada di angka Rp10-15 miliar. Samua pakarjaan yang su jalang yang kepeng dari PAD, DAU, deng DAK, nanti mo proses verifikasi lapangan sabalong bayar.
“Katong harap, pihak katiga tatap tanang tagal samua kawajiban su dapa mangaku dan Pemkot wajib biking abis akang,” pungkas Jopie. (Red)
