AmbonVibes.com — Sabage bantuk komitmen marawat pardameann deng biking kuat relasi lintas iman, Klasis Gereja Protestan Maluku (GPM) Kota Ambon kumbali biking kagiatang, Remaja Baku Dapa Lintas Iman (Rebali). Peserta kagiatang ini adalah ana-ana deng remaja dar komunitas Salam Sarane di Aer Salobar deng Pohon Mangga.
Kagiatang pung tema “Anak Ambon Cinta Damai, Beta Par Ambon, Ambon Par Samua”. Akang barlangsung di kawasan Pengeringan Pantai Aer Salobar, Kecamatan Nusaniwe, Kota Ambon, Senin (29/12/2025).
Program ini manjadi bageang dar upaya barkelanjutan mambangun ruang parjumpaan deng parsudaraan lintas iman di kalangan generasi muda.
Sekretaris Umum MPH Sinode GPM Pandita H.R. Tupan manjalaskan, Rebali ini, Klasis GPM Pulau Ambon yang pung ide, akang su bajalang lima taong. Program ini kamuka dapa rancang par redam katagangan sosial di kawasan Pohon Mangga, mar akang barkambang jadi ruang parjumpaan yang biking kuat relasi parsudaraan antarumat baragama.
“Lima taong lalu kagiatan ini par redam kategangan. Puji Tuhan, akang barhasil dan malahirkan kahidupan barsama yang saling manjaga, saling manyayangi, dan saling manghormati,” ungkap Tupan.
Manurut Tupan, sampe oras ini, sakitar 570 ana deng remaja su jadi bageang dar program lintas iman ini. Eso-eso, GPM barancana mo evaluasi manyaluruh sakaligus biking luas jangkauan kagiatang ka tampa laeng di Kota Ambon.
“Taong muka, Katong mo kumpol kumbali par evaluasi. Katong mo biking kagiatang lebe basar par tampa laeng juga dapa bageang macang depan Ambon Utara, Ambon Timur, bahkan seluruh Kota Ambon,” ujarnya.
Tupan tegaskan, ana-ana deng remaja jadi fokus utama Rebali sabage investasi pardamean jangka panjang. Dia juga buka paluang pangambangan program lintas iman ke komunitas agama laeng macang Katolik, Hindu, deng Buddha.
“Bibit-bibit pardamean musti su tanam dar tempo. Lima sampe 20 taong ka muka, dong ini yang akang jadi pemuda deng orang dewasa buang subdapa bentuk deng nilai-nilai dame,” jelasnya.
Katua Majelis Pekerja Klasis (MPK) Pulau Ambon Pandita W.A. Beresaby pung komitmen yang sama. Pandita bilang, gereja jalankan mandat rekonsiliasi deng biking ana-ana sabage basis strategis pambangunan pardamean pascakonflik.
“Ana-ana ini lahir satalah konflik 1999. Tagal itu, penting par dong bakumpul deng bisa dapa carita yang banar dar orang yang tapat,” katanya.
Rebali taong kalima ini, rame. Ada 530 ana Deng remaja ambe bageang. Dong samua ana Salam-Sarane dapa lia paleng sanang. Apalai, dong pung orang tatua, RT, RW samua kase sumangat.
Staf Ahli Bidang Ekonomi, Pembangunan, dan Kesejahteraan Rakyat, Rustam Simanjuntak datang mawakili Wali Kota Ambon. Dia apresiasi konsistensi GPM deng komunitas lintas iman dalang marawat pardamaean di Kota Ambon.
“Seng gampang kumpol ana-ana deng remaja lintas iman dalang satu ruang kabarsamaan. Karena itu, Katong dorong Kota Ambon jadi jadi rujukan pangambangan komunitas cinta dame di Maluku,” ujarnya.
Manurut Simanjuntak, maski kegiatan sarupa juga barlangsung di tampa laeng Kota Ambon Paleng barhasil kemas program pardamean sacara sistematis, simultan, deng barkasinambungan sahingga akang pung dampak bisa dapa ukur dalang evaluasi.
Waktu tutu kagiatang, Pandita Beresaby ungkapkan, refleksi ana-ana salama Rebali su jadi buku deng judul “Cermin Harmoni”. Akang buku pung isi, tulisan pangalaman deng parasaan salama iko kagiatang kagiatang lintas iman.
“Dong tulis deng hati yang polos deng pono sukacita karena bisa baku dapa deng Iko kagiatang sama-sama. Ini jadi bukti, bahwa ruang dame memang parlu rekayasa dan terus dapa rawat,” pungkasnya. (red)
