AmbonVibes.com — Wali Kota Ambon Bodewin Wattimena ada buang suara par samua warga Kota Ambon. Samua dapa minta par jaga akang situasi kaamanan deng katartiban par salalu aman deng dame. Wali Kota bilang ini tagal anana muda su pica kumbali biking kaco di deka-deka Kampus UIN AM Sangaji, Negeri Batu Merah, Kecamatan Sirimau, Jumat (26/12/2025) siang.
Bodewin tagaskan, kadamean Ambon seng boleh rusak cuma tagal satu dua orang mo manfaatkan situasi par kas pica masyarakat.
“Mari katong baku kele biking Kota Ambon yang aman deng dame. Jang mo dapa cabar deng dapa kas manyabung macang domba dar sapa lai,” kata Bodewin, Sabtu (27/12/2025).
Wali Kota tekankan, masyarakat pung rol paleng panting par jaga stabilitas sosial. Dia biking inga warga par jang bage-bae informasi yang balong jalas banar ka seng, lalu salalu taruh di muka sikap baku hormat deng toleransi satu deng laeng.
Manurut Bodewin, sikap dewasa deng bijak dalang sikapi satiap parsoalan jadi kunci utama par konflik seng jadi basar deng biking rusak kahidupan sosial masyarakat Kota Ambon.
Pemerentah Kota Ambon, kata Bodewin, taru parhatian sarius par konflik yang pica di lingkungan ulang-ulang di tampa yang sama. Dia ajak samua pihak yang iko bakalae par tahang diri lalu biking abis akang deng dialog.
“Konflik di lingkungan kampus musti lia akang sacara dewasa deng seng pake tindakan yang bisa ganggu kaamanan deng katartiban,” tegasnya.
Pemkot Ambon juga dukung upaya-upaya panyalasaian dame, mangimbau mahasiswa deng civitas akademika UIN AM Sangadji Ambon jang mo dapa pangaruh dari sagala cabar-cabar yang biking kabor kaadaan.
Tagal kaco kalamareng, paleng sadiki ada 10 orang dapa luka-luka deng musti dapa parawatan medis. Sampe oras, Polda Maluku masih biking panyalidikan par ungkap panyabab bentrok deng sapa-sapa yang takait.
Wali Kota harap samua elemen masyarakat sama-sama jaga katanangan lalu parcaya aparat keamanan, par jaga Ambon tetap jadi kota aman, dame, deng toleran. (red)
