AmbonVibes.com — Misteri panikaman brutal deng korban sorang padagang patasan di Kota Ambon, Mama Hawa Bahta (54), akhirnya tabuka. Sambilang hari tarduga palaku lari basambunyi, mar aparat Kapolisian Resor Kota (Polresta) Ambon-Lease barhasil loku dia.
Tarduga palaku pung inisial NA alias P (17), remaja yang salama ini dapa tau bisa maeng-maeng di deka-deka tampa korban bajual. NA dapa loku Sabtu malam (20/12/2025) sakitar jam 20.30 WIT, di muka Swalayan Alfamidi, Jalan Diponegoro, kawasan Urimeseng, Kota Ambon.
Kapolresta Ambon-Lease, Kombes Pol. Yoga Putra Prima Setya kase tau, panangkapan palaku ini hasil panyalidikan intensif yang Satreskrim Polresta Ambon Lease karja akang deng bae.
“Panangkapan ini marupakan hasil karja karas deng panyalidikan intensif Satreskrim Polresta Ambon Lease,” ujar Kombes Pol. Yoga waktu dapa konfirmasi, Minggu (21/12/2025).
Pangungkapan kasus ini, akang kamuka mulai dar polisi pi sisir lapak-lapak padagang di kawasan Palabuhan Yos Sudarso Ambon. Abis itu polisi pariksa rekaman CCTV di deka lokasi. Dari rangkaian panyalidikan, polisi kase takait deng keterangan saksi-saksi su dapa pariksa sabalong itu.
Polisi dapa informasi, tarduga palaku biasa sama-sama deng parangpuang nama Sonia Ode, yang sering tidor di muka Karaoke Naff. Dar keterangan lebe lanjut, polisi tau NA biasa dudu-dudu di sapanjang Jalan Diponegoro, kawasan Urimeseng.
Malang Minggu kalamaring sekitar jam 20.30 WIT, tim Satreskrim bagara ka lokasi. Sampe di sana, polisi dapa lia NA ada bakumpul deng dia pung tamang-tamang, pas di muka Alfamidi Urimeseng. Sondor malawang ato biking macang-macang, NA langsung iko polisi
Dalang pamariksaan awal, NA mangaku banar dia yang tikang korban Mama Hawa Bahta. Dia juga bilang piso yang dia pake tusu korban, ada sambunyi akang di rumah, di kawasan Gunung Nona.
Sakitar jam 21.25 WIT, tim kapolisian bagara ka rumah NA par ambe barang bukti. Di muka NA pung Oma deng kaluarga laeng, polisi jelaskan samua takait parkara itu. Pihak kaluarga kooperatif lalu kase iin polisi cari barang bukti.
“Barhasil dapa piso deng langsung amankan akang,” jelas Kapolresta.
Polisi langsung bawa NA deng barang buktu ke Mapolresta Ambon-Lease par iko proses hukum lebe lanjut.
Polisi ungkapkan, korban dan tarduga palaku baku kanal. Palaku biasa datang ke tempat korban bajual patasan, bahkan parnah dapa minta jaga lapak tersebut.
Parkara muncol waktu NA minta patasan ka Mama Hawa, mar seng dapa kase. Dari situ, muncul niat NA par mancuri. Mar Mama Hawa dapa tau NA pung aksi. Mama sempat pegang NA pung tangang lalu gigi dia pung jari tengah tangang kanang.
Situasi pun tambah panas. NA langsung pukul Mama Hawa tiga kali di bageang wajah, lalu ambe Mama pung piso yang ada di deka tampa tidor. Deng piso itu, NA tusu Mama Hawa ulang-ulang sampe korban jatuh badarah-darah. Abis barbuat bagitu, NA langsung bawa piso lalu sambunyi di rumah Gunung Nona.
NA ternyata tinggal deng oma saja tagal papa su maninggal, lalu mama kaweng kumbali. Oras ini, NA ada jadi palajar, iko Paket C di Ambon.
Paristiwa panikaman Mama Hawa akang tarjadi Kamis (11/12/2025) sekitar pukul 03.30 WIT, di depan pagar PGSD Universitas Pattimura, Jalan Dr. Tamaela, Kecamatan Nusaniwe, Kota Ambon. Kasus ini sampat biking hebo warga dan biking khawatir kaamanan padagang kacil di Kota Ambon.
Deng NA su dapa tangka, polisi tegaskan komitmen par biking tuntas kasus ini sesuai katentuan hukum yang barlaku.
“Proses hukum akan katong jalankan sesuai atorang, tarmasuk pananganan khusus tagal palaku masih di bawah umur,” tegas Kombes Pol. Yoga Putra Prima Setya. (red)
