AmbonVibes.com — Pemerentah Kota Ambon ada usaha par bisa kase bantuan beca listrik par opa-opa beca yang umor su di atas 60 taong. Langkah ini jadi bantuk kapadulian nyata pemerentah par kalompok rentan yang salama hidop dar sektor informal.
Wali Kota Ambon Bodewin Wattimena bilang akang waktu kase sambutan di Malam Natal Tim Jamahan Kasih di Taman Pattimura, Kota Ambon, Salasa (16/12/2025).
Wali Kota ungkapkan, Pemkot Ambon su bikin lis opa-opa lansia par dapa bantuan beca listrik, jadi nanti deng seng parlu paksa tenaga fisik yang su lebe kurang.
“Par abang-abang beca yang su umor di atas 60 taong, katong ada barjuang par bisa dapa bantuan beca listrik. Katong su daftar par seng parlu trap beca kayu lai, mar cukup pake beca listrik,” ujar Bodewin.
Manurut Bodewin, kabijakan itu marupakan sikap hormat pemerentah par tukang beca yang dar usia muda sampe tua, masih tatap karja keras par kas hidop kaluarga.
“Mudah-mudahan ini lakas katong realisasi, par di sisa-sisa dong pung kakuatan, katong bisa kase dorongan baru malalui beca listrik,” tegasnya.
Bodewin tambahkan, bantuan beca listrik seng cuma par biking ringan beban fisik tukang beca lansia dong, mar juga tambah jamin dong pung salamat, kasehatan, deng kasajahteraan.
Dia tegaskan, pemerentah pung tanggung jawab moral par kas hadir kabijakan yang batimbang par masyarakat kacil, khususnya dong yang salama ini bakerja sondor dapa parlindungan deng jaminan sosial yang cukup.
Dalam kasampatan itu, Wali Kota ajak samua elemen masyarakat par satu sumbayang satu supaya pemimpin-pemimpin dan samua orang yang dapa kaparcayaan Tuhan, salalu pung hati yang tabuka dan dapa bagara biking kabijakan yang adil.
“Mari katong satu sumbahyang satu, par ada orang-orang bae yang bagara bantu katong samua, tarutama dong yang palang butuhkan,” pungkas Bodewin.
Acara Malam Kajadiang Tim Jamahan Kasih ini pono deng abang-abang beca, panyapu jalang, anana yatim piatu, deng warga kurang mampu, sabage wujud parayaan Natal yang dong maknai malalui aksi kapadulian sosial dan kabarpihakan vor sesama. (keket)
