AmbonVibes.com — Ada 216 aparat negara deng sanjata api lai. Dong jaga gawang mas Gunong Botak di Buru. Mar panggali mas bisa maso sondor aparat tau. Nanti ada musibah, baru panambang bawa diri ka aparat. Tarlambat, satu orang maninggal dunya.
Bagitu sudah carita paleng baru dar Kawasan tambang mas liar Kaku Lea Bumi (Gunong Botak), Kabupaten Buru. Lokasi itu makang korban jiwa manusia. Satu panambang maninggal dunya tagal hirup zat asam baracong di dalang lubang panggalian mas.
Korban pung nama Safrudin Buton, warga Kampung Waprea. Paristiwa itu akang jadi, Sabtu (13/12/2025) kira-kira jam 01.23 WIT, di area yang dong di sana bilang akang Tanah Merah Tambang Mas Gunung Botak.
Akang paleng ironis tagal kajadiang ini cuma seng talalu lama, sejak 216 personel gabungan resmi kas badiri Pos Satgas Pangamanan Kawasan Tambang Mas Gunung Botak, sejak 9 Desember 2025. Aparat gabungan itu, anggota TNI, Polri, deng Satpol PP.
Dari keterangan saksi Endi (31), warga asal Seram, korban deng kawan panambang laeng barangkat ka tampa tambang liar sakitar jam 20.00 WIT.
“Kira-kira jam 20.00 WIT, korban deng beta, tambah satu dua tamang laeng bajalang kaki dar jalur D ka tampa tambang liar Kaku Lea Bumi,” ungkap Endi.
Sasmpe di pertigaan Pos Adat tambang mas liar Gunung Botak, sekitar 200 meter dari Pos Pemantauan TNI-Polri dan Satpol PP, rombongan pilih ambe jalur kiri par bisa lolos dari aparat.
“Ktong ambe jalur kiri par manghindar dari pos pamantauan, lalu iko lereng gunung supaya aparat keamanan seng lia katong,” jelas Endi.
Sampe di lokasi lubang panggalian yang biasa korban pake, Endi deng korban cek lokasi. Dong kas hidop masin alkon par isap kaluar aer dar dalang lubang.
Kira-kira jam 01.15 WIT, korban turung ka dalang lubang panggalian. Akang pung dalang kira-kira 22 meter. Korban mo cek kondisi aer di dalang sana.
“Sakitar jam 01.15 WIT, korban maso ka dalang lubang par cek kondisi aer,” ujar Endi.
Mar tagal korban seng nae-nae, Endi bilang dia iko maso dalang lubang par cek. Seng lama, Endi langsung kaluar tagal dapa ciong uap zat asang yang paleng karas.
“Karena zat asang paleng tinggi, beta langsung kaluar dar kolam,” katanya.
Endi lalu bataria ulang-ulang minta korban lakas nae mar seng ada respons. Endi deng tamang nama Risman asal Amnon, langsung lari pi di pos tampa patroli gabungan TNI-Polri dan Satpol PP.
Abis dapa laporan, aparat gabungan langsung evakuasi. Dong biking hidop masin alkon kumbali par sedot air. Dong juga pasang blower oksigen par bantu evakuasi.
Aparat karja karas deng keadaan barat, akhirnya barhasil angka kaluar korban dar dalang lubang pada jam 02.45 WIT. Mar korban pung nyawa seng dapa tolong lae. Aparat bilang, korban su abis napas.
Dar katarangan saksi, korban turung dalang lubang sondor pake alat bantu oksigen (blower) jadi dong yakin korban kana racong gas asang yang manguap dar dasar lubang panggalian. Korban pung tamang-tamang komunikasi deng keluarga, par bawa pulang ka Desa Waprea.
Dar pantauan di lapangan, sampe malang hari, aktivitas panambangan liar masih bajalang tarus di Gunung Botak. Panambang-panambang pake jalur-jalur khusus par maso ka ke area tambang, maski kawasan itu su ada dalang status pangamanan Satgas.
Peristiwa ini kumbali biking orang bale batanya, bagemena pangawasan di kawasan Gunung Botak. Ratusan personel gabungan di lapangan itu dong karja apa.
Kasus ini jadi sinyal karas par aparat panegak hukum evaluasi manyaluruh soal kinerja Satgas Pangamanan, agar tragedi macang bagini seng taulang kumbali, jang ada korban jiwa lae, eso-eso. (Tim)
