AmbonVibes.com – Wali Kota Ambon Bodewin Wattimena tegaskan, sumpah jabatan par Aparatur Sipil Negara (ASN) bukang cuma ritual formalitas, malaengkang pung konsekuensi moral deng tanggong jawab basar par nagara, masyarakat, deng Tuhan Yang Maha Esa.
Wali Kota Bodewin bilang akang waktu kase sambutan par angka sumpah deng lantik pejabat fungsional di lingkungan Pemerintah Kota Ambon, di ruang rapat Kantor Balai Kota Ambon, Jumat (5/12/2025).
“Seng samua orang dapa kase kasampatang macang har ini. Akang pung arti, kaparcayaan musti pegang akang bae-bae. Apa yang katong bilang dalang sumpah, bukang cuma orang laeng dengar mar lebe dar itu Tuangala dengar akang,” tegas Bodewin.
Bodewin bilang, ucap sumpah itu akang pung tanggong jawab basar di bahu ASN.
“Kalo su pilih jadi ASN, bararti musti siap taika dalang sumpah janji, etika ASN, deng saluruh katantuan yang barlaku,” ujarnya.
Bodewin juga sorot jabatan fungsional pung panting yang manuntut kaahlian khusus, beda deng posisi struktural. Manurut dia, seng samua orang pung kamampuan jadi tanaga kasehatan, guru, maupun profesi teknis yang laeng.
“Kanaikang pangkat deng tanggong jawab jabatan fungsional itu beda deng struktural, tagal akang pung basis kaahlian khusus. Maka bapa dan ibu musti jadikan ini sabage motivasi par karja lebe profesional,” kata Bodewin.
Dia harap para pajabat yang baru diapa lantik bisa jalangkan tugas deng integritas, disiplin, deng dedikasi tinggi, sehingga pelayanan publik di Kota Ambon tamba prima.
Bodewin tekankan, posisi ASN bawa kawajiban yang beda dar masyarakat umum. Satiap pejabat musti taruh kapentingan masyarakat di atas kapentingan pribadi, deng manfaatkan keahlian profesional par dorong kamajuan daerah. (Piere)
