AmbonVibes.com – Anana muda Kota Ambon Manise biking gebrakan. Dong kasbadiri satu wadah nama Yayasan Belang Musika Maluku (BMM). Plh. Sekda Maluku Kasrul Selang resmikan akang yayasan di Kafe Teluk Indah Poka, Ambon, Kamis (4/12/2025) malang.
Acara paluncuran Yayasan BMM pake tema “Today With Jazz in Ambon 2025”. Hadir dalang acara ini antara laeng wakil-wakil Pemerentah Provinsi Maluku, Pemerentah Kota Ambon, para musisi, komunitas kreatif, deng pelaku industri musik.
Dari Konferensi Musik Indonesia
Salah satu pentolan yang kas badiri Yayasan BBM Alternard Jimmy Waas waktu kase sakapur sirih, ada kastau, ide par kasbadiri Yayasan BMM akang muncul dalang Konferensi Musik Indonesia di Jakarta, 8-11 Oktober 2025.
“Waktu di Konferensi Musik Indonesia, katong dar Ambon ada stori-stori deng banya musisi. Dar situ, katong samua tau, Ambon sabage Kota Musik Dunya pung potensi kreatif yang basar paskali, mar musti dapa tongka deng ekosistem yang sehat, ada pung arah, deng musti profesional,” kata Alternard.
Dia bilang, dong kasbadiri yayasan ini par buka ruang kolaborasi, edukasi, deng mo biking bae kesejahteraan musisi di Maluku.
Manurut Alternard, Yayasan BMM pung tiga misi utama, yaitu bangong ekosistem musik yang inklusif, sadia wadah par kas majo talenta-talenta, deng dorong profesionalitas dan kasajahteraan musisi.
Plh. Sekda Maluku Kasrul Selang waktu kase kata sambutan, paleng taruh hormat par anana muda pung inisiatif. Kasrul mangaku, identitas Ambon sabage kota musik memang parlu dapa jaga deng ekosistem musik yang bae.
“Ini bukang cuma soal panggung partunjukan musik, mar musik jadi kakuatang budaya deng ekonomi Maluku,” kata Kasrul.
Sabalong Kasrul bicara deng resmi Yayasan BMM, Kadis Pariwisata Kota Ambon Christian Tukloy musik, kuliner, deng fesyen jadi prioritas ekonomi kreatif di Ambon.
“Yayasan BMM tantu biking kuat pondasi Ambon sabage Kota Musik Dunya. Akang tambah warna par musik batumbuh, bagara dari ide maso industri,” kata Tukloy.
Abis paluncuran, langsung lanjut deng konser musik jazz, kasnae musisi-musisi idealis Kota Ambon, macang Willy Waas, Hesty Siwabessy, Grace Syauta, Allan Tehupuring, deng kelompok yang ada nae daong Palita Project. (Leo)
